Ingabo za Somalia zifatanije n’iz’Umuryango w’Ubumwe bwa Afurika (AMISOM)
zigaruriye umujyi wa Barawe wari umaze imyaka itandatu ufatwa nk’igicumbi cy’umutwe wa Al Shabaab ku Cyumweru tariki ya gatanu Ukwakira.
Umujyi wa Barawe ukora ku nyanja y’u Buhinde , uri ku birometero 200 uvuye mu majyepfo y’Uburasirazuba bw’umurwa mukuru Mogadiscio. Wari umaze imyaka itandatu mu maboko y’intagondwa za Al Shabaab.
RFI ivuga ko abarwanyi ba Al Shabaab batangiye kuva muri uyu mujyi guhera ku wa gatanu, nyuma y’ukwezi kumwe gusa umuyobozi wabo Ahmed Godane yishwe.
Umuryango w’Ubumwe bwa Afurika uvuga ko intagondwa za Al Shabaab zawukoreshaga mu kwambutsa intwaro ndetse n’ubundi bucuruzi zigaba ibitero ku murwa mukuru wa Somalia, Mogadiscio,.
Roland Marchal inararibonye ku bibera mu ihembe rya Afurika avuga ko kuba intagondwa za Al Shabaab zambuwe uwo mujyi ari ikimenyetso gikomeye cyo gutsindwa kwazo .
Ariko aburira ingabo za Somalia na AMISOM ko zidakwiye kwirara kuko Al Shabaab ikiri ikibazo nubwo igaragaza ingufu nke.
TANGA IGITEKEREZO