Inkuru ya AFP ivuga ko uko kurasa kwabaye ejo ku wa Gatatu,ariko imirwano yarakomeje kugeza mu gitondo cyo kuri uyu wa Kane.

Itangazo ry’Ingabo za Loni ziri mu butumwa bw’amahoro muri Sudani y’Epfo (UNAMISS) rivuga ko habaye imirwano irimo abitwaje intwaro ntoya, imihoro n’izindi ntwaro.

Inkambi ya Malakal icumbikiye abantu bagera ku 47,700. Muri iyo nkambi nta muntu wemerewe gutunga intwaro.

Abaturage barasobanya na Loni ku mubare w’abaguye mu mirwano.Uwitwa Jack Nhial yavuze ko byibuze abantu 12 ari bo bishwe hifashishijwe imbunda ziremereye n’intoya, mu gihe umwe mu bayobozi b’abaturage witwa Deng Amum yabwiye Eye Radio y’i Juba ko byibuze batanu ari bo bishwe,abagera kuri 38 bagakomereka.

Kugeza ubu abateye iyo nkambi ntibaramenyekana.
Mu kwezi kwa kane 2014 , abantu bitwaje intwaro bishe abasivile 48 bari mu nkambi ya Loni mu mujyi wa Bor.

Ababarirwa mu bihumbi icumi bamaze kwicwa, mugihe abarenga miliyoni ebyiri bakuwe mu byabo n’intambara yashegeshe iki gihugu kuva muri 2013,ubwo havukaga ubwumvikane bucye hagati ya Perezida Salva Kiir na Riek Machar wari Visi Perezida we, amushinja gushaka kumuhirika ku butegetsi.