Abakinnyi ba filime, abaririmbyi b’ibyamamare , abanyapolitiki n’abacuruzi bavumbuwe ku munsi w’ejo ko babitsa rwihishwa akayabo k’amafaranga muri Banki yo mu Busuwisi HSBC bakwepa kwishyura imisoro n’izindi nkurikizi.
Ishami ryo mu Busuwisi rya Bank y’Abongereza HSBC riregwa gufasha ibyamamare n’ibikomerezwa kunyereza imitungo no kutishyura imisoro ibafungurira konti zo guhishaho amafaranga.
Amabanga yagiye ahagaragara yerekana ko banki HSBC ari nayo ya kabiri ikomeye ku Isi ibitse miliyari 100 z’amadorali y’abantu bo mu bihugu 200 bitandukanye batigeze bishyura imisoro.
Ihuriro mpuzamahanga ry’Abanyamakuru b’iperereza (ICIJ) rivuga ko abakiriya ba HSBC bagera ku 7000 bafunguye konti biyita “abakozi bo mu rugo”.
Muri bo harimo n’abanyapolitiki ndetse n’abakuru b’ibihugu banyereza umutungo w’ibihugu bayoboye.
Abandi bari barahinduye amazina kugira ngo bashobore kubita muri banki mu Busuwisi harimo Lolowah al-Faisal Al Saud umukobwa wa Faisal wari umwami wa Arabie Saoudite wari ufiteho miliyoni ebiri z’amadorali, umuririmbyi Phil Colllins, Aliko Dangote, Diego Forlan, Fernando Alonso, abami, Abdullah wa II wa Jordan na Mohamed VI wa Maroc, n’abandi.
TANGA IGITEKEREZO