Ni mu gihe abantu benshi bari biteze ko Trump uherutse gukora amavugurura menshi, mu mategeko yari yarashyizwe na Barack Obama wamubanjirije, ikijyanye n’abatinganyi n’abahinduje ibitsina byabo nacyo atazagisiga.

Itangazo ryashyizwe ahagaragara na perezidanse ya Amerika rivuga ko Perezida Trump azakomeza kubaha no gushyigikira uburenganzira bw’abaryamana bahuje ibitsina n’abihunduje kandi ashimishwa no kuba ariwe mukuru w’igihugu wa mbere wagize icyo abivugako ubwo yemeraga kwiyamamariza kuba perezida.

Washington Post dukesha iyi nkuru ivuga ko ibi bitangajwe mu gihe hari hamaze iminsi hacicikana amakuru avuga iteka rya Obama ribuza gutanga akazi mu nzego za leta hagendewe ku gitsina Trump afite gahunda yo kurikuraho.

Umuyobozi w’ihuriro ry’abaharanira uburenganzira bwa muntu muri Amerika, Chad Griffin yavuze ko n’ubundi hakiri impungenge ko ubutegetsi bwa Trump bushobora kugira byinshi bubangamira bishingiye ku gitsina.

Yakomeje avuga ko ababana bahuje ibitsina b’impunzi, abimukira, abayisilamu n’abagore badatuje kandi kugira ubwoba kwabo bifite ishingiro.

Iteka ryasinywe na Obama mu 2014 riteganya ko mu gutanga akazi mu nzego za leta hadakwiye gushingirwa ku gitsina cyangwa kuba umuntu aryamana n’abagabo cyangwa abagore.

Iri teka kandi ryasabaga ibigo by’ingenga bikorana na leta gushyiraho amategeko arebana no kurwanya ivangura rikorerwa abakozi baryamana n’abo bahuje ibitsina.

Nubwo iri teka ritishimiwe n’abantu batandukanye barimo n’abanyamadini, ryari rifite igisobanuro gikomeye ku banyamerika kuko rikurikizwa n’ibigo ibihumbi 24 bikoresha abakozi basaga miliyoni 28.