Nyuma yo gustinda amatora, uwahoze ari Minisitiri w’Intebe wa Tuniziya, Beji Caid Essebsi, yarahiriye ku mugaragaro kuyobora Tuniziya nka Perezida wayo mu buryo bwemewe n’amategeko, ni umuhango wabaye mu gitondo cyo kuri uyu wa gatatu tariki ya 31 Ukuboza 2014.

Uyu mugabo ufite imyaka 88 yatsinze amatora y’umukuru w’igihugu ku itariki ya 21 Ukuboza 2014.

Yagize ati “Ndahiye mu izina ry’Imana kurinda ubwigenge bwa Tuniziya n’ubusugire bwayo, kubaha itegeko Nshinga n’andi mategeko no guharanira inyungu za Tuniziya mu kuyikorera.”

Uyu mugabo w’imyaka 88, Beji Caid Essebsi yasezeranyije Abanyatuniziya kuba umuyobozi wabo bose atagize abo atoneshe ngo abandi abareke ndetse abizeza kubageza ku bumwe n’ubwiyunge busesuye.

Beji Caid Essebsi niwe mu Perezida wa Mbere Tuniziya igize watowe muri Demokarasi nyuma y’imyaka 4 mu mvururu yakurikiye ihirikwa rya Hosni Mukarak wakuwe ku butegetsi mu mpera za 2010.

Beji yagize amajwi 55.68% arusha mu buryo bugaragara Moncef Marzouki wayobora Tuniziya mu nzibacyuho.

Nyuma yo kurahira yagize ati “Ntahazaza ha Tuniziya hatariho kumvikana kw’amashyaka ya Politiki ndetse na sosiyete sivili.”

Ishyaka rye Nidaa Tounès, ryatsinze amatora y’abagize inteko ishinga amategeko muri Nzeri uyu mwaka, rizasabwa kutiharira imyanya rishyiremo n’abayisilamu bo mu ishyaka Ennahdha.