Ibikorwa bya Guverinoma ya Turukiya byo kwibasira abanyamakuru batavuga rumwe n’ubutegetsi byahagurukije abantu batandukanye hirya no hino ku Isi barimo abayobozi mu nzego zikomeye imbere mu gihugu no hanze yacyo bose banenga ibikorwa Turikiya ikorera Abanyamakuru.

Amagana y’abanyaturukiya bafite ubwenegihugu bwa Amerika ku wa Gatandatu bigaragambirije ku cyicaro cya Loni i New York basaba ko Turukiya yubahiriza ubwisanzure bw’itangazamakuru.

Kimwe no muri Turukiya, abigaragambya baribitwaje ibyapa biriho ubutumwa butandukanye bugaragaza ko itangazamakuru ryigenga ritagomba kunigwa na rimwe ariko basaba na Guverinoma kubahiriza amahame ya Demokarasi.

Iyi myigaragambyo iraterwa n’itabwa muri yombi ry’abanyamakuru bazwiho kutaripfana barimo Ekrem Dumanlı, umwanditsi mukuru w’Ikinyamakuru gikomeye muri Turukiya, Zaman n’umuyobozi wa Televiziyo Samanyolu, Hidayet Karaca batawe muri yombi ku wa 14 Ukuboza 2014, bazira gukora ibiganiro binenga bimwe mu bikorwa bya Leta iyobowe na Perezida Recep Tayyip Erdoğan .

Mu myigaragambyo yabaye kuwa Gatandatu Perezida w’Ikigo ndangamuco cya Turukiya giherereye i New York, Sadri Altınok, yanenze bikomeye iryo higwa n’ifatwa rikomeje gukorerwa abanyamakuru, aho yavuze ko ibi bikorwa bidashingiye ku bimenyetso ndetse bihonyora n’uburenganzi bw’itangazamakuru.

Yagize ati “Turasaba Guverinoma kubaha abaturage bose ba Turukiya kandi igomba kubahiriza amategeko n’ubutabera, hagamijwe kurinda ubwisanzure bw’itangazamakuru ndetse no kutabangamira amahame ya Demokarasi mu gihugu.”

Imyigaragambyo isa n’iyi kandi yabere mu mijyi ikomeye irimo Boston, Chicago, Los Angeles, Brussels, London n’ahandi. Abigaragambya bose basaba Guverinoma kubahiriza amahame ya Demokarasi ndetse bakanasaba irekurwa ry’abanyamakuru bose bafunzwe.

Umuyobozi w’Ikinyamakuru Zaman, ishami ryo mu Bubiligi Selçuk Gültaşlı mu ijambo yavugiye mu myigaragambyo yabereye i Brussels yavuze ko ishyaka riri ku butegetsi muri Turukiya ryahindutse irinyagitugu. Yasabye buri wese ushaka Demokarasi gufatanya n’itangazamakuru.

Mu Bwongereza abigaragambya bafunze iminwa bakoreshe Bande z’umukara mu gihe i Los Angeles, umukinnyi wa filimi muri Amerika Bruce Davison yanenze iryo higwa rikomeje gukorerwa abanyamakuru atanga urugero ko nko muri Amerika utapfa kubona umwanditsi w’Ikinyamakuru nka The New York Times cyangwa The Wall Street Journal atabwa muri yombi ngo n’uko atemeye raporo runaka cyangwa ngo hagire ufatwa ngo n’uko atamaganye Al Qaeda.

Mu bandi bamaganye ibikorwa bya Guverinoma ya Turukiye harimo Umuryango w’Ubumwe bw’Uburayi, Leta zunze Ubumwe z’Amerika (USA), Human Right Watch, Inteko Nshingamategeko y’Uburayi, Ishyirahamwe rirengera abanyamakuru ku isi, Amnesty International, Minisitiri w’ububanyi n’amahanga wa Canada, n’abandi benshi biganjemo intumwa z’imiryango mpuzamahanga ikorera muri Turukiya.

Bose barasaba ko abo banyamakuru barekurwa ku buryo bwihuse ntayandi mananiza.

Umuvugizi wa Deparitoma y’Amerika, Jen Psaki yagize ati “Duhangayikishijwe n’itabwa muri yombi ry’abanyamakuru n’abandi bafite aho bahuriye n’itangazamakuru muri Turukiya byakozwe mu mpera z’icyumweru (cyashize)”. Ibi kandi abihuriyeho n’umuvugizi w’Akanama k’umutekano mu biro bya Perezida Obama, Mark Stroh usaba Turukiya gukora iperereza ryihuse, mu mucyo kandi bigakorwa mu buryo bwubahiriza amategeko. Iyi myigaragambyo ikomeje kubera hirya no hino ku Isi