Abaturage bagiye ku mihanda n’uburakari bukabije, nyuma y’impanuka ikomeye yabaye mu kirombe cy’amakara (charbon) ku wa kabiri hakaba hamaze gutangazwa abasaga 274 bahitanwe nayo.

Iyo mpanuka yatewe n’icyuma cy’amashanyarazi cyaturikiye mu birometero bigera kuri bibiri munsi y’ubutaka bituma ibyuma bitanga umwuka mu kirombe bihagarara.

Nk’uko tubikesha Aljazeera, Polisi y’iki gihugu yatangaje ko ku wa Gatatu tariki 14 Gicurasi yakwirakwije ibyuka bihumanya mu bihumbi by’abaturage bakwiye imihanda mu gace ka Ankara ahitwa Kizilay bigaragambya ko hatabarwa amagana y’abakozi bakiri mu nda y’Isi .

Ubutabazi burakomeje/Photo Internet

Imyigaragambyo nk’iyi bivugwa ko yabereye no muri Istanbul, ahitwa Taksim ndetse no mu mujyi wa Soma aho iki kirombe cyaturikiye.

Minisitiri w’Intebe, Recep Teyyip Erdogan, yavuze ko iyi mpanuka igomba gukorerwa iperereza hakamenyekana icyayiteye mu gihe bikivugwaho umubare munini ukiri mu nda y’Isi binavugwa ko hari amahirwe make yo kubarokora bakiri bazima.

Abigaragambya bo bakwiye imihanda ya Istanbul baririmba ko abagize Guverinoma bakwegura banashimanhira ko uyu Minisitiri Erdogan ari “umwicanyi n’igisambo”.

Polisi yashyizeho abarinda ibitaro bya Soma bakumira aba bigaragambya ngo badasatira ahri abakozi bo mu birombe basaga 450 bamaze gutabarwa.

Hagati aho Minisitiri Erdogan yatangaje icyunamo cy’iminsi itatu asaba ko n’amabendera y’igihugu yakurururwa, ariko bivugwa ko yaba yasubitse urugendo rw’abanyamahanga bari kuza gusura i Soma ahabereye impanuka, nyuma y’aho imodoka yari arimo yibasiwe n’abigaragambyaga.

Abayobozi babuga ko abaturage bahitanwe n’umwuka w’ubumara wa "carbon monoxide nyuma y’uguturika kw’imashini yakwirakwizaga umuriro w’amashanyarazi mu kirombe.

Bakomeza bavugako igikorwa cy’ubutabazi kikibangamiwe n’uko umwobo wari umaze kuba muremure cyane ucyakamo umuriro.

Ikigo Soma Komur Isletmeleri AS, Nyuri iki kirombe, cyatangaje ko impanuka yabaye nubwo bari bafite ubwirinzi buri ku kigero cyo hejuru ari na yo mpamvu hagikomeje iperereza ku cyateye iyi mpanuka.

Minisiteri y’Abakozi muri iki gihugu yatangaje ko yagenzuye iki kirombe inshuro eshanu guhera mu 2012 harimo iyo muri Werurwe 2014 basanze bumwe mu burenganzira bw’abakozi buhonyorwa.

Abatacuga rumwe na Leta bavuga ko Minisitiri w’Intebe Erdogan yanze icyifuzo cy’Inteko Ishinga Amategeko cyo kgukurikirana impanuka zibera mu birombe bya Soma cyane ko hasanzwe hamenyerewe impanuka ziterwa n’ubwirinzi budahagije bw’abacukuzi.

Iyi mpanuka ibaye iya kabiri ihitanye imbaga nini y’abacukuzi, ikurikiye iyo mu 1992 yahitanye abakozi 263 hafi n’Inyanja y’umukara ku cyambu cya Zonguldak.

Abaturage bazabiranyijwe n'uburakari bashinja Guverinoma kugira uruhare muri iyi mpanuka