Minisitiri w’Uburezi, Edouard Geffray, yabitangaje ku mugoroba wo ku wa Kane mu kiganiro cyaciye kuri televiziyo, nyuma y’undi munsi w’imyigaragambyo y’abanyeshuri bo mu mashuri yisumbuye.

Guverinoma yatangaje ko kuva imyigaragambyo yatangira, abantu 6.877 batawe muri yombi, barimo 86% batarageza ku myaka 18.

Ku wa Kane, abantu bagera ku 71.000 bigaragambije hirya no hino mu gihugu, barimo 24.000 bateraniye ahitwa Bastille muri Paris.

Polisi yongeye gukoresha ibyuka biryana mu maso kugira ngo itatanye amatsinda yayiteraga amabuye n’ibikoresho biturika byakorewe mu ngo.

I Bordeaux, abigaragambya bangije ishuri ryisumbuye, mu gihe i Marseille umuyobozi wungirije w’ishuri yakubiswe.

Ku wa Gatanu, amashuri yisumbuye agera ku 140 muri 3.500 yari afunze burundu cyangwa igice kimwe. Nubwo ayo mashuri yagabanyutse ugereranyije n’iminsi yabanje, indi myigaragambyo yateganyijwe ku wa Kabiri utaha.

Ikibazo cy’abarimu bagenda ntibasimburwe kimaze igihe gituma abanyeshuri batakaza amasaha menshi y’amasomo.

Geffray yavuze ko porogaramu nshya y’ikoranabuhanga muri minisiteri izafasha kohereza abarimu 3.000 mu mashuri agera kuri 500 yagaragaye ko abakeneye kurusha ayandi.

Menshi muri ayo mashuri ashobora kuba ari mu nkengero z’imijyi zituwemo n’abimukira benshi, aho ibura ry’abarimu rikomeye cyane.

Minisitiri yanijeje kongera amafaranga muri gahunda isanzwe yo guhemba abarimu bemera gukora amasaha y’inyongera, kugira ngo bafashe kuziba icyuho cy’abadahari.

Yavuze kandi ko ibibazo by’abanyeshuri bizitabwaho mu biganiro ku ngengo y’imari y’uburezi ya 2027.

Nathanaël Combary, uhagarariye ihuriro Renouveau Lycéen, yavuze ko abanyeshuri bategereje kureba uko ibyo basezeranyijwe bizashyirwa mu bikorwa.

Ati “Hari ibyatangajwe bihuye na bimwe mu byo dusaba. Ariko abantu bashaka kubona amafaranga n’ibisubizo bifatika.”

Abandi bahagarariye abanyeshuri bavuze ko bazakomeza imyigaragambyo kugeza ibyo basaba byujujwe.

Jean-Luc Mélenchon yashimye imyigaragambyo yo ku wa Kane, abinyujije kuri X avuga ko abanyeshuri “bongeye kwigarurira Bastille”.

Ku rundi ruhande, Laurent Jacobelli wo mu ishyaka National Rally yanenze ibyemezo bya guverinoma, avuga ko bishobora gutanga ubutumwa bw’uko urugomo ruhesha abarukoresheje ibyo bashaka.

Iyi myigaragambyo y’abanyeshuri ni yo ikomeye kurusha indi yabaye mu Bufaransa mu myaka myinshi ishize. Ije mu gihe hari n’uburakari ku izamuka ry’ibiciro bya lisansi n’ibibazo by’abahinzi.

Abanyeshuri bigaragambije kubera ibibazo by'abarimu bake mu mashuri