Minisitiri w’Ububanyi n’Amahanga w’u Bufaransa, Jean-Noël Barrot, yasabye ko Ambasaderi wa Iran muri Paris ahamagazwa, ndetse igihugu cye gitangaza ko kizafata “ingamba zikwiye” nyuma y’icyo cyemezo cya Iran.

Umuvugizi wa Minisiteri y’Ububanyi n’Amahanga y’u Bufaransa, Pascal Confavreux, yavuze ko gufunga icyo kigo ari “igitero gishya ku bikorwa by’umuco by’u Bufaransa muri Iran”, ashimangira ko bidakwiye kandi ko bitakwemerwa.

Ku Cyumweru tariki 20 Nzeri 2026, Iran yatangaje ko yafunze icyo kigo cyigishaga Igifaransa, ivuga ko cyakoraga ibikorwa binyuranyije n’amategeko ndetse n’amasezerano agenga imibanire y’ibihugu.

Iran yatangaje ko icyo kigo cyari gifitanye isano na Ambasade y’u Bufaransa i Tehran kandi ko cyari kimaze imyaka gikora kivuga ko gitanga amasomo y’ururimi.

Iran yavuze ko icyo kigo cyakoresheje nabi uburenganzira cyari gifite nk’ikigo cyigisha ururimi, ndetse ko cyageragezaga “kumenya no gushyiraho uburyo bwo gukorana” n’abantu bakomeye mu gihugu no kubafasha kuva muri Iran.

U Bufaransa bwamaganye ibyo birego bya Iran, butangaza ko buzafata ingamba zo gusubiza icyo gikorwa kandi bugahamagaza Ambasaderi wa Iran i Paris kugira ngo atange ibisobanuro.