Ba ambasaderi w’ibi bihugu uko ari bitatu muri Loni, mu ibaruwa banditse kuri uyu wa Gatanu bagize bati “Twakwishimira iperereza ry’itsinda ry’ubunyamabanga bw’Umuryango w’Abibumbye rishinzwe igenzura ry’ishyirwa mu bikorwa ry'umwanzuro wa 2231 w’akanama gashinzwe amahoro.”

Umwanzuro wa 2231 w’akanama gashinzwe amahoro ushyigikira amasezerano mpuzamahanga yo gushyiraho ibihano ku ihererekanywa ry’intwaro kirimbuzi za Iran.

Mu ibaruwa yabo yashyikirijwe akanama k’umutekano n’Umunyamabanga Mukuru wa Loni, Antonio Guterres, ba ambasaderi bavuze ko biteguye gushyigikira igikorwa cyose cy’ubunyamabanga mu iperereza rya tekiniki kandi ritabogamye.

Bakomeje bavuga ko bahangayikishijwe n’ikurwa ry’intwaro zo mu bwoko bwa (UAVs) muri Iran zijyanwa mu Burusiya rinyuranye n’uwo mwanzuro nk'uko inkuru ya Rfi ibivuga.

Intwaro za “ UAVs” zirimo gukoreshwa n’u Burusiya mu ntambara muri Ukraine mu kugaba ibitero ku bikorwaremezo bya gisivile n’imijyi yo hirya no hino muri Ukraine bigatuma abasivile b’inzirakarengane babiburiramo ubuzima.

Ambasaderi w’u Bufaransa muri Loni, Nicolas de Riviere, yasabye Iran guhagarika vuba na bwangu ubufasha ubwo ari bwo bwose iha u Burusiya mu ntambara burimo muri Ukraine.

Ibihugu byo mu Burengerazuba bw’isi bishinja Iran kohereza drones mu Burusiya, izo buri gukoresha mu bitero byo muri Ukraine. Perezida wa Leta Zunze Ubumwe za Amerika ku wa Kane yavuze ko abasirikare ba Iran bari ku butaka bwa Crimea bafasha Abarusiya kugaba ibitero bya drones.

Nubwo bimeze bityo, ambasaderi w’u Burusiya muri Loni, Vassily Nebenzia, yavuze ko ibyo birego ari ubundi bwoko bw’ibihuha biri gukwirakwizwa.

Ati “Turamagana umugambi wo kwinjiza ubunyamabanga bwa Loni muri ibi bikorwa by’umwanda.”

Iran na yo yamaganye ibyo birego byerekeye ikoreshwa rya drones mu Muryango w’Abibumbye mu ntangiriro z’iki cyumweru.

Hagati aho Minisiteri w’Ububanyi n’Amahanga w’u Bufaransa, Catherine Colonna, kuri uyu wa Gatanu yavuze ko ari ingenzi kudacana umubano n’u Burusiya aburira ko Perezida Vladimir Putin yaguye mu mutego w’icyerekezo kidasanzwe cy’isi.

Ati “ Turatekereza ko ari ngombwa gukomeza kuvugana n’abafata ibyemezo by’u Burusiya barimo na Perezida Putin.”

Macron yagiranye ibiganiro byinshi na Putin ngo u Burusiya bureke gutera umuturanyi wabwo ariko biba iby’ubusa.