Ibiro Ntaramakuru by’Abafaransa, AFP byatangaje ko nyuma y’uko umurambo umwe w’uruhinja utahuwe mu gitondo cyo ku wa kane, indi mirambo ine yatahuwe mu nzu y’ahitwa Louchats hafi y’umujyi wa Bordeaux.

Polisi yavuze ko se w’abo bana, w’imyaka 40 , ari nawe wavumbuye umurambo w’uruhinja rwa mbere, yatawe muri yombi, naho umugore we w’imyaka 35 wagaragaraga nk’uwabyariye imuhira ari wenyine akajyanwa mu bitaro.

Abaganga basanze nta kibazo cy’uburwayi bwo mu mutwe uwo mubyeyi yari afite, kandi hari hashize iminsi mike akorewe ibizamini.

Kuri uyu wa gatanu nibwo ibizamini biza kwerekana niba izo mpinja zari zavutse zigihumeka.Uyu muryango usanzwe ufite abana babiri b’abakobwa b’imyaka 13 na 15.

Mu 2010 , mu Bufaransa undi mubyeyi yemeye ko yishe abana umunani yari amaze kwibaruka, mu 2009 nabwo, umubyeyi wo muri icyo gihugu yahamwe no kwica abana be batatu akabahisha muri firigo.

.