Urukiko rw’ubujurire rw’i Paris kuwa kane rwatesheje agaciro ubujurire bwa Tito Barahira na Octavien Ngenzi bakekwaho uruhare muri Jenoside yakorewe Abatutsi mu 1994 batashakaga kuburanishirizwa mu rukiko ruhana ibyaha bikomeye.

AFP ivuga ko aba bagabo bombi bahakana ibyaha baregwa, bakaba bemerewe kongera kujurira kugirango barebe ko bakwemererwa kuburanira mu nkiko zisanzwe.

Tito Barahira w’imyaka 63 na Octavien Ngenzi w’imyaka 69 basimburanye kuyobora Komini ya Kabarondo kuva mu 1977 kugeza mu 1994, baregwa kugira uruhare mu bwicanyi bw’Abatutsi bahungiye muri Kiliziya yaho kuwa 13 Mata 1994.

Uru rubanza ni urwa kabiri u Bufaransa buburanishije kuri Jenoside yakorewe Abatutsi nyuma y’urwa Pascal Simbikangwa wakatiwe igifungo cy’imyaka 25.

Ibiro Ntaramakuru by’Abafaransa bivuga ko Octavien Ngenzi yafatiwe mu birwa bya Mayotte mu 2004 ashaka ubuhungiro ku mpapuro z’impimbano naho Tito barahira agafatwa muri Mata 2013 I Toulouse aho yari atuye.

Ishami rishinzwe ibyaha byibasiye inyokomuntu mu Rukiko Rukuru rwa Paris riri gukora iperereza ku Banyarwanda 20 bakekwaho ibyaha bya Jenoside.

Nta munyarwanda n’umwe u Bufaransa burohereza kuburanishirizwa mu Rwanda.
Urubanza rw’aba bagabo bombi rufite umwihariko kuko ruzaba rurimo abatangabuhamya bagizweho ingaruka n’ibyaha by’aba bagabo ndetse na bamwe mu nshuti zabo za hafi.

[email protected]