Ubwiyongere bwa Covid-19 bukomeje gukaza umurego mu Burayi, aho ibihugu nk’u Budage byagize abanduye barenga ibihumbi 33, ari nabo benshi banduye muri iki gihugu ku munsi umwe kuva iki cyorezo cyatangira.

Ibi kandi niko bimeze mu bihugu nk’u Burusiya, aho Umurwa Mukuru wa Moscow uherutse gushyirwa muri Guma mu Rugo, naho ingamba zikomeye zo kwirinda ikwirakwira ry’iki cyorezo zamaze kongera gushyirwaho mu Murwa Mukuru wa Ukraine, i Kiev.

Ibihugu birimo u Bwongereza nabyo bikomeje kubona ubwiyongere buri hejuru bw’abandura Covid-19, ari nako bimeze mu bindi bihugu cyane ibyiganje mu Burasirazuba bw’u Burayi, byanagize ikibazo cy’inkingo zihagije.

Bamwe mu basanzwe bakurikirana iby’ubuzima mu Burayi, basabye ko uyu Mugabane ukwiye guhaguruka ugashyiraho ingamba zikomeye ku bantu banga kwikingiza, kuko ari bo bari kuzahazwa n’iki cyorezo.

Hagati aho, abarenga miliyoni eshanu bamaze guhitanwa n’iki cyorezo, gusa uretse u Burayi, aho ubwandu bwa Covid-19 bwiyongereye ku kigero cya 6%, ibindi bice by’Isi bifite imibare iri kugabanuka cyangwa ikaguma ku kigero kimwe.