Ku wa 3 Ukwakira 2026, Minisiteri y’Ububanyi n’Amahanga y’u Burusiya yatangaje ko ingabo zabwo zizakomeza kugaba ibitero ku bikorwa bya gisirikare muri Ukraine. Yavuze ko ari ukwihorera ku bitero ishinja ingabo za Ukraine kugaba ku baturage no ku bikorwaremezo byo mu Burusiya.

Iyo minisiteri yaburiye abanyamahanga, barimo abakozi ba ambasade, kwirinda kuguma muri Ukraine cyangwa kuyijyamo. Yavuze ko abazirengagiza iyi mpuruza ari bo bazabazwa ingaruka bazahura na zo.

Ibi bibaye mu gihe u Burusiya bwongereye ibitero ku bikorwaremezo bya Kyiv, birimo iby’amashanyarazi, itumanaho, imihanda na gariyamoshi. Bwibasiye kandi ibiraro biri ku mugezi wa Dnipro, bihuza ibice by’iburasirazuba n’iburengerazuba by’uwo mujyi.

Ibitero bikomeje guhungabanya ubuzima bw’abaturage bagera kuri miliyoni eshatu batuye Kyiv, mu gihe igihe cy’ubukonje bukaze cyegereje.

Mu kiganiro yagiranye na Reuters, Zelenskyy yavuze ko inzego z’ubutasi za Ukraine zabonye inyandiko zigaragaza amabwiriza mashya ya Perezida Vladimir Putin yo kwagura ibitero bikibasira ibikorwaremezo bitandukanye.

Zelenskyy yavuze ko ayo mabwiriza ategeka kwibasira imihanda, amashuri n’ibitaro, agamije gushyira igitutu ku baturage kugira ngo bave muri Kyiv no mu yindi mijyi. Ibiro bya Perezida w’u Burusiya ntibyabonetse ngo bigire icyo bivuga kuri ibyo birego.

Zelenskyy yatangaje ko Ukraine izasubiza ibyo bitero yibanda ku nganda zitunganya peteroli mu Burusiya, kuko zituma icyo gihugu kibona amafaranga yo gukomeza intambara. Yashimangiye ko Ukraine itazibasira ibikorwaremezo bya gisivili uko yishakiye. Impande zombi zihakana ko zigaba ibitero zigambiriye kwibasira abasivili.

Perezida Putin yari yavuze muri icyo cyumweru ko Ukraine iri kwishyura ikiguzi cy’ibitero yagabye ku Burusiya, kandi ko ingabo ze zizakomeza kwibasira ahantu hatandukanye muri icyo gihugu.

Mu mezi ashize, ibihugu byombi byongereye ibitero ku bwato butwara ibinyampeke mu Nyanja y’Umukara. Inganda zitunganya peteroli n’ibindi bigo byo mu Burusiya na byo bikomeje kugabwaho ibitero na Ukraine.

Ni mu gihe ubutegetsi bwa Perezida wa Amerika, Donald Trump, bukomeje gushaka gusubukura ibiganiro byo kurangiza intambara. Trump yari yasabye Ukraine kwirinda kwibasira ibikorwa bya peteroli byo mu Burusiya, avuga ko ibyo byatumaga ibiciro bya mazutu ku Isi bizamuka.

Zelenskyy ariko yavuze ko nta kimenyetso arabona cy’uko Putin ashaka ibiganiro by’amahoro cyangwa ubwumvikane bwo guhagarika ibitero ku bikorwaremezo by’ingufu.

Yatangaje ko yiteguye guhura na Putin mu nama ya G20 izabera i Miami mu Ukuboza, ariko asaba Amerika kudasubukura umubano usanzwe n’u Burusiya mbere y’uko amahoro agaruka.

Mu gihe inzira y’ibiganiro itarasobanuka, impande zombi zikomeje gutangaza ko zizakaza ibitero, buri ruhande rukavuga ko rusubiza ibyo rwagabweho.