Leta Zunze Ubumwe z’Amerika ku wa 31 Ukuboza 2014zarekuye abagabo batanu bari bafungiye muri Gereza ya Guantanamo boherezwa gutuzwa muri Kazakhstan bituma abafungiwe muri iyi gereza bagera ku 127.

Ikinyamakuru New York Daily News, kivuga ko abo bagabo batanu barimo 2 b’Abanyatuniziya, n’abandi batatu bo muri Yemen.

Bose bafatiwe muri Pakistan bakurikiranweho gukorana n’umutwe w’iterabwoba Al-Qaeda.

Bari bamaze imyaka irenga 12 muri gereza ya Guantanamo ariko bose nta n’umwe wigeze ugezwa imbere y’ubutabera ngo ahamwe ibyaha. USA zagaragaje ko nta mpamvu n’imwe yo gukomeza kubafunga.

Leta ya Washington yatangaje ko yabarekuye, ikabohereza muri Kazakhstan igihugu cyemeye kwakira imfungwa zivuye muri Guantanamo.

Leta ya Washington ntabwo itangaza impamvu itabohereje mu bihugu bavukiyemo. Abagera kuri 30 bamaze gufungurwa kuva aho Perezida Obama yongeye kubura umugambi wo gufunga iyo gereza.