Ku wa 1 Ugushyingo nibwo Nate usanzwe afite ubuhanga mu bumenyi bw’Isi, yitabiriye ikiganiro The Ellen DeGeneres Show, yitwaje igikombe cyuzuyemo amadolari. Ni ku nshuro ya gatandatu yari atumiwe muri iki kiganiro.
Ubwo yabazwaga impamvu yazanye aya mafaranga, uyu mwana yasubije Degeneres ko ari ayo yakuye mu bucuruzi bw’umutobe ukozwe mu ndimu kandi yifuza kuyamuha ngo azayakoreshe mu bikorwa byo kwita ku ngagi.
Ati “ Kubera ko ari ay’ingagi zawe […], niyo mpamvu nayazanye. Ni amadolari 258.63”
Degeneres wakozwe ku mutima n’igikorwa cy’uyu mwana, yahise amubwira ko ingagi zishimiye ibyo akoze, aya mafaranga akaba agiye kuyashyira mu kigega aho azashishikariza abandi bana gutera ikirenge mucye.
Mu kumushimira Ellen yamuhaye impano y’akamashini ko gucururizaho yise "Lemon-Nate".
Muri Gicurasi 2018 nibwo Ellen DeGeneres yageze mu Rwanda aherekejwe n’umukunzi we Portia de Rossi, baje gutangiza umushinga wo kubaka ikigo kizajya gifasha mu bikorwa byo kubungabunga Ingagi muri Pariki y’Igihugu y’Ibirunga (Ellen DeGeneres Campus).
Ni umushinga watangijwe biturutse mu mpano Portia de Rossi yahaye DeGeneres ku wa 20 Mutarama 2018 ubwo yizihizaga isabukuru y’imyaka 60 y’amavuko.
Ibitekerezo 0