Ibigo bikomeye mu buvuzi hirya no hino ku Isi bikomeje gusiganwa mu rugendo rwo gushaka umuti n’urukingo by’iki cyorezo gikomeje gukwirakwira ku migabane hafi ya yose y’Isi.
Imibare igaragazwa n’ishuri ryigisha iby’Ubuzima mu Mujyi wa Londres mu Bwongereza (London School of Hygiene and Tropical Medicine), igaragaza ko hari inkingo 120 zatangiye gukorwaho ubushakashatsi, mu gihe izigera ku 10 muri zo zigeze mu kiciro cy’igeragezwa.
Uruganda rwo mu Mujyi wa Hong Kong ni rwo rugeze kure mu gushaka urukingo rwa COVID-19 kuko rwo rwatangiye icyiciro cya kabiri cyo kugeragereza urukingo rwarwo ku bantu benshi.
Mu rugendo rwo kugerageza ubushobozi bw’urukingo urwo ari rwo rwose, hakorwa igeragezwa mu byiciro bitandukanye, aho bahera ku nyamanswa ubundi bagakurikizaho abantu.
Abantu bo bakorerwaho igeragezwa mu byiciro bitatu ; nyuma y’icyiciro cya kabiri, hakorwa irindi gerageza rya gatatu rikorerwa ku mubare munini, ubundi urukingo rukaba rwahabwa uburenganzira bwo gutangira gushyirwa ku isoko.
Indi mishinga itatu y’Abashinwa na yo igeze kure kuko iri ku cyiciro cya mbere cyo gukora igerageza ku bantu.
U Bwongereza n’u Budage na byo biri mu bihugu byatangiye umushinga wo gushaka urukingo rwa COVID-19, ubu buri mushinga ukaba ugeze ku cyiciro cya mbere cyo kugeragerezwa ku bantu.
Leta Zunze Ubumwe za Amerika zo zatangije imishinga ibiri itandukanye; umwe uri gukorwa n’uruganda rwa Biotechnologie Moderna rufatanyije n’ikigo cy’igihugu gishinzwe ubuzima mu gihe undi wo uri gukorwa n’ikigo gikora imiti cya Biotech Inovio Pharmaceuticals.
Kubona urukingo rwujuje ubuziranenge ni cyo gisubizo cyizewe cyo kurandura burundu icyorezo cya COVID-19, kimaze guhitana abasaga 211 890 ku isi hose.
Ishami ry’Umuryango w’Abibumbye ryita ku Buzima (OMS) n’ibindi bigo bikomeye ku Isi bikora imiti, baherutse gutangaza ko urukingo rushobora kuboneka hagati y’amezi 12 na 18.
Abahanga barimo Sarah Gilbert, wigisha muri Kaminuza ya Oxford na Frédéric Tangy, ukorera Ikigo cy’Ubushakashatsi cy’Abafaransa (Institut Pasteur) bavuga ko urukingo rushobora kuzaboneka mu mpera za 2020.
TANGA IGITEKEREZO