Nubwo byagaragaye ko uru rukingo rushobora kuyirinda ruracyari gukorerwa igerageza. Gusa, tariki 3 Mutarama uyu mwaka byemejwe ko rushobora gukoreshwa mu gihe hakenewe ubutabazi bwihutirwa.

Africa Nation itangaza ko uru rukingo rwa Covaxin rufite ubushobozi bwo kurinda umuntu Covid-19 ku rugero rwa 78%, harimo na Coronavirus yihinduranyije yo mu Buhinde yagaragaye muri Uganda n’iyo mu Bwongereza yabonetse muri Kenya.

Ubushakashatsi bwakozwe n’Ikigo cy’Igihugu gishinzwe Ubushakashatsi bwerekeye ubuvuzi mu Buhinde ku bufatanye na Bharat Biotech ndetse n’Ikigo cy’Ubushakashatsi cya National Institute of Virology, byose byagize uruhare mu ikorwa rya Covaxin, bwagaragaje ko uwarutewe adashobora kwinjirwa na Covid-19 yihinduranyije.

Ubu bushakashatsi bwakorewe ku bantu 28 bakoreweho igerageza rya Covaxin ndetse n’abandi 17 bakize Covid-19, bwerekanye ko uru rukingo rushobora kubarinda bose.

Kugeza ubu mu Buhinde hari ikibazo gikomeye cy’ubwiyongere bukabije bw’ubwandu bwa Coronavirus, aho mu minsi 12 ishize buri munsi handura abarenga ibihumbi 300, ndetse muri iyo minsi gusa hamaze gupfa abagera ku 3.417.

Umurwa Mukuru New Delhi, leta ya Maharashtra, Karnataka, West Bengal, Odisha n’iyitwa Haryana zose zashyizwe muri guma mu rugo.

Kuva Coronavirus yaboneka mu Buhinde, tariki 27 Mutarama, abantu hafi miliyoni 20 bamaze kuyandura, mu gihe abahitanwe nayo barenga ibihumbi 200.