Ishyaka ry’abarepubulika ryatoreye kunangira kubahiriza iteka rya Perezida wa Leta Zunze Ubumwe za Amerika Barack Obama ryo gutuza abimukira miliyoni 5 batagira ibyangombwa byo gutura bamaze imyaka itanu baba muri icyo gihugu, bafite abana.

Ibi bibaye mu gihe Leta 17 z’icyo gihugu nazo zateganyaga kurega Obama mu nkiko ku bw’iryo teka.

Umushinjacyaha wa Leta ya Texas, Greg Abbott yemeza ko Obama yihutiye guca iryo teka mu kwezi gushize, kandi hari undi mushinga w’ impinduka muri politike ijyanye n’abimukira umaze igihe waraburijwemo.

Yagize ati “Perezida arirengagiza inshingano ze zo gukurikiza amategeko yashyizweho ku buryo bwemewe n’abagize Inteko Ishinga Amategeko ahubwo agashaka gusubiramo amategeko ku bijyanye n’abimukira kandi atabifitiye ububasha”

Ikinyamakuru Fox News kivuga ko Leta ya Texas n’izindi nka Dakota y’Amajyaruguru, Alabama, Géorgie, Idaho, Indiana, Kansas, Louisiane, Maine, Mississippi, Montana, Nebraska, Caroline ya Ruguru n’Epfo, Utah, Virginie na Wisconsin zigiye kurega Obama.

Iyi gahunda ya Perezida Obama itavuga rumwe na benshi igamije gutanga uruhushya rwo gutura muri USA igihe cy’imwaka itatu ku bantu miliyoni 5 binjiye muri icyo gihugu ku buryo butemewe n’amategeko ariko bamaze imyaka itanu kandi bafite abana bahavukiye.

Ubutegetsi bwa Obama buvuga ko uyu mushinga uzatuma hiyongera uburyo bw’ubugenzuzi bwo ku mipaka ndetse ugatuma abafatirwa mu byaha bitandukanye aribo bibandwaho mu kwirukanwa muri Leta Zunze Ubumwe za Amerika.

Muri iki cyumweru Visi Perezida wa Amerika Joe Biden yabwiye abo mu ishyaka ry’aba Republicain barwanya uyu mushinga wa Obama ko baba bakoze ikosa rikomeye baramutse banize ku munota wa nyuma iri tegeko rijyanye n’abimukira.