Nyuma y’uko abayobozi b’umujyi wa Chicago muri Leta Zunze Ubumwe za Amerika, bashyiriye hanze amashusho y’umupolisi w’umuzungu arasa inshuro 16 umwirabura w’ingimbi, bamwe mu bayobozi b’abirabura bakomeye muri uyu mujyi, barasaba ko hakorwa iperereza kuri iki gikorwa cy’ubunyaswa cyakorewe Laquan McDonald, ndetse bakanasaba iyegura ry’umuyobozi wa polisi mu mujyi wa Chicago.

Ikinyamakuru The New York Times cyanditse ko binyuze mu itangazo basohoye, abayobozi b’abirabura, mu madini atandukanye, mu nzego za politike n’abandi bahagurukiye kwamagana igikorwa cy’indengakamere cyakozwe n’umupolisi witwa Jason Van Dyke warashe umwirabura w’ingimbi witwa Laquan McDonald muri 2014.

Amatsinda aharanira uburenganzira bwa muntu ndetse n’abagize amatsinda aharanira uburenganzira bw’abirabura basabye umukuru wa Polisi muri Chicago, Garry F. McCarthy kwegura kubera ko yananiwe gucunga umutekano mu duce twegereye aho abirabura batuye.

Umupasitori witwa Jesse Jackson n’abandi bayoboke bo mu madini atandukanye basabye Abanyamerika kwigaragambya, basaba ko haba impinduka muri polisi yo mu mujyi wa Chicago.

Kuri uyu wa gatatu, Perezida Obama yatangaje ko ababajwe cyane n’ayo mashusho yashyizwe hanze na polisi.

Ati "Byambabaje cyane ku giti cyanjye, ndashimira abaturage bo mu mujyi wanjye kuba bari gukora imyigaragambyo mu mahoro.’’

Laquan McDonald, wari ufite imyaka 17 yarashwe n’umupolisi w’umuzungu witwa Jason Van Dyke mu mujyi wa Chicago, tariki ya 20 Ukwakira 2014. Uyu mupolisi akurikiranyweho icyaha cy’ubwicanyi.

Mc Donald warashwe

Abari mu myigaragambyo kubera urupfu rwa Laquan McDonald

Icyemezo cya muganga cyerekana inshuro Laquan yarashwe

Jason Van Dyke warashe Laquan McDonald