Nk’uko amakuru aturuka mu bantu bazi iby’imbere muri icyo kigo abivuga, inganda zishobora gufungwa zirimo iz’i Hanover, Zwickau, Emden ndetse n’urwa Audi ruherereye i Neckarsulm, ibintu byatuma imirimo irenga 45.000 ishobora guhagarara.

Izi gahunda ziri gusuzumwa mu rwego rwo kuvugurura imikorere y’uru ruganda, aho ubuyobozi bwa Volkswagen bwamaze kumenyesha abagize inama y’ubugenzuzi iby’izi mpinduka, bikaba biteganyijwe ko zizaganirwaho mu nama yo ku wa 9 Nyakanga.

Umuyobozi Mukuru wa Volkswagen, Oliver Blume, yatangaje ko uru ruganda rugomba gukora impinduka zikomeye kugira ngo rushobore guhangana n’ihindagurika ry’isoko, cyane cyane rituruka ku bakora imodoka z’amashanyarazi bo mu Bushinwa bamaze kwigarurira isoko.

Iyi gahunda inateganya kugabanya ishoramari rya Volkswagen ku kigero cya 15%, rikagera hafi kuri miliyari 130 z’Amayero mu myaka itanu iri imbere, mu rwego rwo kugabanya ibiciro no kongera ubushobozi bwo guhangana ku isoko.

Nubwo iyi gahunda ikomeje gutera impaka, ihuriro ry’abakozi ndetse n’ishyirahamwe rikomeye ry’abakozi mu Budage IG Metall byatangaje ko bizarwanya byimazeyo iki cyemezo, bivuga ko kizagira ingaruka zikomeye ku miryango y’abakozi no ku bukungu bw’igihugu.

Volkswagen ikomeje kandi gushyirwa ku gitutu n’ihangana rikomeye ku isoko ry’u Bushinwa, aho ibigo byo muri icyo gihugu bikora imodoka z’amashanyarazi bikomeje kwigarurira isoko, bigatuma isoko rya Volkswagen rigabanuka ku rwego mpuzamahanga.

Ubuyobozi bw’uru ruganda buvuga ko impinduka z’ingenzi zidakwiye kwirengagizwa kugira ngo Volkswagen ikomeze kubaho no guhangana ku isoko ry’imodoka rihinduka vuba.

Volkswagen ishaka gufunga inganda enye no kwirukana abakozi 100.000