Amakuru y’urupfu rwa William Hedgcock Webster yamenyekanye mu mpera z’iki cyumweru, atangajwe n’umuryango we. Wavuze ko ari umugabo wakundaga urugo rwe, akaba sekuru, sekuruza ndetse agakunda igihugu cye byimazeyo.

Uyu mugabo yayoboye FBI imyaka icyenda, mbere yo kuyobora CIA kuva mu 1987 kugeza mu 1991 ku butegetsi bwa Perezida Ronald Reagan na George H. W. Bush.

Webster wabaye umucamanza mbere yo kwinjira mu nzego z’ubutasi n’umutekano, yagizwe Umuyobozi wa FBI mu 1978 mu gihe urwo rwego rwari rukomeje guhungabanywa n’amakimbirane ndetse n’amakosa y’imikorere.

FBI yamushimiye umuhate we n’ubwitange yagaragaje, igira iti “ Ni umukozi wa Leta witanze ku rwego rwo hejuru wamaze imyaka irenga 60 akorera igihugu.”

Webster yavutse ku wa 6 Werurwe 1924 i St. Louis, Missouri, akorera mu gisirikare kirwanira mu mazi nka Ofisiye, mu Ntambara ya Kabiri y’Isi n’Intambara yo muri Koreya. Mu 1949 yabonye impamyabumenyi mu Mategeko yakuye muri Kaminuza ya Washington, nyuma akora nk’umushinjacyaha n’umucamanza w’Urukiko rw’Akarere.

William Hedgcock wayoboye CIA na FBI yapfuye