Film yitwa Obama’s America 16( Amerika ya Obama mu 2016), yanditswe na Dinesh D’Souza, usanzwe ari n’umwanditsi w’ibitabo bya politiki, yemeza ko Obama afite umugambi wo gusenya Amerika ntizongere guhaka ibihugu byo ku Isi.

Nk’uko bigaragara mu kinyamakuru Le Figaro, ngo iyi filrm ikomeje gukundwa cyane ndetse mu byumweru bitandatu imaze gucuruzwamo miliyoni zisaga 9 z’amadolari ya Amerika ndetse ikaba imaze kwerekanwa mu byumba bya Cinema 10.

Hari impamvu zikomeye D’Suza atanga zirimo urwango se wa Obama yangaga abakoroni, ijambo yavugiye muri Misiri ko Amerika igomba kubana neza mu bwubahane n’Abayisilamu, kutabangamira umugambi wa Iran wo gucura ibitwaro bya kirimbuzi n’ibindi. Ibi byiyongeraho kuba atarabashije kugabanya amadeni Amerika ifite. Ngo ibi D’Suza akaba abona ko ari intwaro kirimbuzi yasenya ubudahangarwa bw’Amerika, ndetse akemeza ko yongeye gutorwa ibintu byaba bibi cyane.

Ibikubiye muri iyi film byanejeje abo mu ishyaka ry’Abarepubulikani bakeka ko baba babonye iturufu yo gutsindishiriza umukandida wabo Mitt Romney.

Nyamara indi nyandiko yasohotse mu kinyamakuru le Figaro, igaragaza Romney uhanganye na Obama nk’umuntu abanyamerika badafite icyo bazi ho yaba mu byiza cyangwa ibibi. Bavuga kandi usibye kuba yarabaye guverineri wa Massachusetts, akaniyamamaza kabiri mu matora y’umukuru w’igihugu bitatumye amanyekana. Abo mu ishyaka batavuga rumwe ry’Abademukarate, bo bamufata nk’umuherwe wita gusa ku nyungu z’abakire ndetse n’ugendera ku myumvire ishaje y’ishyaka rye, ibi Abanyamerika bakaba batabikunda.

Barack Obama n'uwo bahanganye mu matora Mitt Romney

Gusa bamwe bashyigikiye Romney nk’umuntu w’umucuruzi ukomeye, w’imitungo myinshi ibarirwa muri miliyoni 200 na 250 z’amadolari y’Amerika. Ibi bigatuma bumva ko ubu bunararibonye bwe mu by’imari hari icyo bwazakora ku bukungu bw’Amerika bwazahaye.

Romney Bamugaragaza nk’umuntu udashobora kunamba ku cyemezo. Biragoye kumenya icyo yemera, aha bashingira ku kuba mu kwiyamamaza kwe, yaragaragaje kwivuguruza ku itegeko ryo gukuramo inda. Bamugaragaza nk’utakigira idini, aho bavuga ko yigeze kuba misiyoneri, mu idini ry’abera b’imperuka nyamara nyuma y’imyaka 2 akabivamo.

Gusa hari ibindi bagaragaza ko abaihuje na Obama, kuba barize muri Havard, gutekereza mbere yo gufata ibyemezo, gukunda gukemura ibibazo, kwiyamamaza amaze kwemeza abo mu ishyaka rye n’ibindi.

Amatora y’umukuru w’igihugu muri Amerika ararimbanije, Mitty Romney yamaze kwemezwa bidasubirwaho n’ishyaka rye ko azahatana na Barack Obama mu Gushyingo kw’uyu mwaka.