Abantu 10 bapfuye abandi 40 barakomereka mu gitero cyagabwe mu gitondo cyo kuri icyi cyumweru tariki ya 1 Nyakanga 2012 ku nsengero zo muri Kenya, mu gace ka Garissa kari hafi y’umupaka wa Somaliya.

Polisi yo muri iki gihugu yavuze ko ibi bitero byagabwe ku nsengero z’idini gatolika ndetse n’idini rya African Inland Church (AIC) ziri mu mujyi wa Galissa. Polisi yakomeje ivuga ko muri iki gitero hakoreshejwe ibisasu byo mu bwoko bwa gerenade ndetse n’amasasu asanzwe.

BBC dukesha iyi nkuru ivuga ko inkengero z’igihugu cya Kenya zagiye zibasirwa n’ibitero, nyuma y’aho iki gihugu cyohereje ingabo muri Somalia mu guhangana n’umutwe w’inyeshyamba za Al-Shabab.

Agace ka Garissa kabereyemo ubu ubwicanyi, ni umujyi munini uri mu Majyaruguru y’u Burasirazuba ku birometero 140 uvuye ku mipaka ya Somaliya. Uyu mujyi uri hafi y’inkambi y’impunzi ya Dadaab ahaherutse gushimutwa abakozi bafasha bafasha izo mpunzi, umushoferi umwe akahasiga ubuzima.