Park Geun-Hye, umukobwa wa Park-Chung Hee wayoboye Koreya y’Amajyepfo mu gihe cy’imyaka 18, yatsindiye kuba Perezida wa mbere w’umugore wa Koreya y’Amajyepfo.

Park Geun-Hye aturuka mu ishyaka riharanira impinduramatwara. Ni umugore w’imyaka 60 y’amavuko, akaba yatsindiye ku majwi 51,6% mu gihe mugenzi we Moon yari afite amajwi 48%.

Umunyamakuru ukorera muri Koreya y’Amajyepfo Lee Joo-Hee yatangarije IGIHE ko Park Geun-Hye yatowe n’abaturage ba Koreya bagera kuri miliyoni 15,77 mu gihe Moon yatowe n’abaturage ba Korea bagera kuri milyoni 14,69.

Park Geun-Hye yatangarije abaturage ba Koreya aho bari bateraniye i Gwanghwamun mu murwa mukuru wa Seoul ko ibyo yabasezeranyije Abanyakoreya azabikora, yongeraho ati “ Iki ni igihe cy’ibyishimo ku baturage ba Koreya.”

Amatora yo muri Koreya y’Amajyepfo yabaye ku wa 19 Ukuboza 2012, akaba yari yitabiriwe n’abaturage ba Koreya bagera kuri 40,507,842.