Guverinoma ya Libiya yirukanye ku buyobozi Minisitiri w’intebe nyuma y’ukwezi kumwe yari amaze atowe, Inteko Ishingamategeko yasanze atarubahirije iminsi ntarengwa yahawe yo gushyiraho guverimoma nshya.

Mustafa Abu Shagour wari Minisitiri w’Intebe watowe bwa mbere mu mateka ya Libiya, yirukanywe kuri uwo mwanya aregwa kudashobora guhuza igihugu kivuye mu ntambara, gushyiraho abandi baminisitiri na za minisiteri.

Ijwi ry’Amerika ryatangaje ko Mustafa yirukanywe nyuma yo kuvugurura guverinoma bitewe n’ igitutu abaturage bamushyizeho babinyuze mu myigaragambyo, banenga ko badahagarariwe mu Nteko Ishingamategeko.

Kwirukanwa kwa Minisitiri w’intebe Mustafa byemejwe ubwo Abadepite bateranaga ku Cyumweru, 81 muri 125 batora ko avaho.

Mu ijambo yavuze ku Cyumweru, Mustafa yavuze ko uburyo guverinoma ihagaze harimo amakosa ariko avugako Inteko Ishingamategeko iramutse imufashije amakosa yavamo.

Nyamara bagendeye ku Itegeko rigenga Inteko Ishingamategeko, mu byumweru bike biri imbere bagomba kuba batoye undi Minisitiri w’Intebe.

Ibibazo bimwe na bimwe bigikomeza kwibasira Libiya Mustafa yakomeje guhura nabyo, byiganjemo kwambura intwaro inyeshyamba, no kuvana intwaro mu baturage .