Abantu bakabakaba 100 batawe muri yombi mu Bushinwa bakekwaho ko bakwirakwije ibihuha bivuga ko isi igiye kurangira, mu gihe hari umugabo uregwa gusogota abana 22 na we afite imyumvire nk’iyo.

Nk’uko byatangajwe na Agence Chine Nouvelle, nibura abantu 93 bamaze gutabwa muri yombi muri uku kwezi kw’Ukuboza, 41 muri bo bakaba ari abo mu idini ryahanuye ko isi izarangira ku wa 21 Ukuboza 2012.

Agence Chine Nouvelle gikomeza kivuga ko 37 babarizwa mu itsinda ryiswe ”Dieu tout puissant” (Imana ishobora byose) bafatiwe mu ntara ya Oinghai mu majyaruguru y’Uburengerazuba, naho bane bafatirwa muri Mongolie nyuma y’ubushukanyi bakoreye abantu biganjemo abashaje.

Kivuga kuri iyi nkuru, ikinyamakuru Times cyagize kiti "’Dieu tout puissant’ bakanguriye abayoboke babo guhirika Ishyaka ry’abakomunisiti ryo mu Bushinwa bise ’grand dragon rouge’ banahamiriza aba bayoboke ko ikinyejana gishya kiyobowe na Kristo w’igitsina gore kigiye kuza, nyuma y’uko uwo Kristo w’umugore yigaragaje mu zuba ku wa cyenda Ukuboza i Pekin."

Abayoboke b’iri dini na none bavuga ko ku wa 21 Ukuboza imiyaga ifite ingufu n’imitingito bizagwira ku isi bikayinyeganyeza.