Turi ku wa 26 Werurwe 2025.

Bangladesh irizihiza Ubwigenge yabonye yigobotoye ubukoloni bwa Pakistan mu 1971.

Ibi ni bimwe mu byaranze uyu munsi mu mateka

1854: Jean-Joseph Hirth watangije akaba n’Umushumba wa mbere wa Kiliziya Gatolika mu Rwanda ni bwo yavutse.

1962: Abatutsi babarirwa hagati ya 1.000 na 2.000 barimo abana n’abagore, barishwe mu cyahoze ari Perefegitura ya Byumba mu gihe abandi batwikiwe bagasahurwa ibyabo ndetse bakamburwa n’ubutaka bwabo.

1934: Mu Bwongereza hatangijwe gahunda y’ibizamini by’uruhushya rwa burundu rwo gutwara ibinyabiziga.

1997: Muri Amerika habonetse imibiri 39 y’abayoboke b’itsinda nyobokamana ryiyitaga “Amarembo y’Ijuru (Heaven’s Gate) bivugwa ko bapfuye biyahuye kubera imyemerere.

Mu muziki

2002: Celine Dion yashyize hanze “A New Day Has Come”, album ye ya mbere nyuma yo kwibaruka imfura ye, René-Charles wari wavutse mu 2001. Iyi album yamaze igihe iyoboye izikunzwe mu bihugu bitandukanye birimo Leta Zunze Ubumwe za Amerika, u Bwongereza na Canada.

Abavutse

1973: Larry Page, Umunyamerika w’umuhanga mu bya mudasobwa uri mu bashinze urubuga rwa Google.

1982: Mikel Arteta, umunya-Espagne wakiniye ikipe ya Arsenal akaba anayibereye umutoza muri iki gihe.

Abapfuye

1984: Ahmed Sékou Touré, umunyapolitiki wabaye perezida wa mbere wa Guinée-Conakry.

2005: James Callaghan, umunyapolitiki w’Umwongereza wanabaye Minisitiri w’Intebe w’iki gihugu.