Ibiro by’ubutasi bya leta Zunze Ubumwe za Amerika, FBI birangajwe imbere n’uwari umuyobozi wabyo J.Edgar Hoover byagerageje kwambika icyasha impirimbanyi yarwanyije ivanguraruhu , Martin Luther King bamuhimbira ibinyoma by’uko aca inyuma umugore we ariko bifata ubusa.
Impapuro z’ibanga zashyizwe ahagaragara n’ikinyamakuru The New York Times zerekana ingamba za FBI zo gusebya no guca intege Martin Luther King ngo areke urugamba rwo guharanira uburenganzira bw’abirabura yari yatangiye.
Uwavugaga rikijyana muri USA mu myaka ya za 1950 -1960 akaba yari anayoboye, FBI, J. Edgar Hoover na Martin Luther King ntibacanaga uwaka.
Hoover yitaga L. King indyarya iruta izindi zose mu gihugu mu gihe undi nawe yamushinjaga kurebera no gushyigikira ihohoterwa ry’abirabura .
Mu ibaruwa yanditswe mu 1964 uyu mugabo wari usa nk’ukomeye kurusha abandi muri leta Zunze Ubumwe za Amerika yateye ubwoba Martin Luther King Jr. amubwira ko azamusebya ko aca inyuma umugore we.
Nubwo atigeze abishyira mu bikorwa yagaragaje uburakari atewe n’uko abirabura bari bakamejeje basaba guhabwa uburenganzira bwabo.
Iyo baruwa yashyizwe ahagaragara n’ikinyamakuru The New York Times igaragaza umuntu utivuga izina asaba King gutega amatwi.
Ati” Tega amatwi wa musambanyi we wumve ibigiye kukubaho. Ugiye kugaragurwa mu cyondo iminsi yose isigaye yo kubaho kwawe .”
Yamusabye kwiyahura. Ati ” Kuri wowe igisigaye ni kimwe gusa. Urakizi? Ni ukwiyahura! ”
Ibi ariko ntibyigeze bisebya na gato Martin L. King , ahubwo byarangiye FBI n’umuyobozi wayo ari bo bisebeje.
Nyuma y’imyaka 50 ibyo bibaye, King afatwa nk’intwari n’icyitegerezo cy’ imyitwarire iboneye.
Ku rundi ruhande Hoover washakaga kumusebya yabaye iciro ry’imigani ku Isi yose.
Martin Luther King wiciwe mu mujyi wa Memphis ku ya 4 Mata 1968 yahawe igihembo cy’amahoro cyitiriwe Nobel mu 1964. Nyuma gato y’urupfu rwe, USA yashyizeho umunsi wo kumwibuka aba ari nawe mwirabura wa mbere wibutswe muri icyo gihugu.
J. Edgar Hoover yayoboye FBI mu gihe cy’imyaka 48. Yakoreye abaperezida 8 batandukanye. Ibikorwa bye byo kuyoborana igitugu byatumye uzajya ayobora FBI ahabwa manda y’ imyaka 10 gusa.
TANGA IGITEKEREZO