Mu ntangiriro y’uru rugendo, hari abantu babiri; Paul Kagame na Fred Gisa Rwigema. Bombi bari inshuti kuva bakiri abana, bakura bahuje indoto n’ibiganiro byuzuyemo amateka y’urugamba rw’Inyenzi bumvaga mu magambo y’abari bararurwanye.

Iby’aya mateka ni ingingo Kagame yagarutseho mu 2021 mu bukwe bwa Gisa Teta, umukobwa wa Gen. Maj Fred Gisa Rwigema.

Ati “Twabanye n’umuryango wa Kimonyo (se wa Fred Rwigema) ahantu habiri. Twabanye Nshungerezi, turangije tujya Tooro ndetse no muri Tooro tukajya twimuka tuva hamwe tukajya ahandi ariko turi kumwe […] Hari umubyeyi ngira ngo yarashaje (yarapfuye) witwaga Suzanne, kuri uwo mugore habaga umuntu witwaga Mariko ngira ngo yari yarabaye mu Nyenzi, wari uvanze umubyeyi umwe ngira ngo yari umuzungu, undi akaba Umunyarwanda, tukajya tujya gutarama kuri uwo mugore turi abana bato, ndetse Ababyeyi bakatumerera nabi kuko bavugaga ko twazerereye, twagiye mu mihana, ariko twabaga twajyanywe n’uwo Mariko, tukajya kumubaza ibijyanye n’izo Ntambara z’Inyenzi yatubwiraga, n’uko zagendaga.”

Yavuze ko “ayo mateka twumvaga turi aho dufite imyaka umunani, icyenda, irindwi, bikaba byaravuyemo icyatugejeje hano uyu munsi.”

Ibyo biganiro by’abana byaje gukura bihinduka umugambi, barushijeho kunoza ubwo bombi bari mu gisirikare cya Uganda, nyuma yo gufasha Perezida Yoweri Kaguta Museveni kugera ku butegetsi.

Mu gitabo Conversations with the President of Rwanda, umunyamakuru François Soudan yabajije Perezida Kagame niba yemera ko RPA yarwanye urugamba rwo kubohora u Rwanda, yashingiwe mu gisirikare cya Uganda. Kagame yasubije adategwa, ati “Yego, twarabikoze. Ni ukuri.”

Ariko ikirenze byose, ikiganiro cya Soudan cyahishuye indi ngingo ikomeye: Ese igitekerezo cyo gushinga RPA cyaturutse kuri nde?

Kagame yagize ati “Cyaturutse muri twe (muri jye na Fred), gikura gihereye aho.”

Perezida Museveni wari umaze igihe gito ageze ku butegetsi, ndetse arajwe ishinga no guteza imbere Uganda no gutsura umubano n’ibihuhugu byo mu karere ntiyashyigikiye uyu mugambi, ndetse Leta ya Uganda yagerageje kuwitambika binyuze mu gutatanya abari bawuhuriyeho.

Ubutegetsi bwa Uganda bwari bwateguye kohereza Rwigema kwiga muri Amerika, Kagame muri Nigeria, Chris Bunyenyezi mu kindi gihugu, Peter Bayingana mu Burusiya.

Mu kiganiro yagiranye n’abakoresha imbuga nkoranyambaga cyabereye ku Mulindi wa Byumba ku wa 9 Nyakanga 2024, Perezida Kagame yavuze ko “Bashatse kudutatanya kugira ngo tudakomeza gutegura ibyo twashakaga gukora. Bashakaga kohereza bane bakuru muri twe hanze ya Uganda kugira ngo tujye mu masomo.”

Kagame amaze kubimenya, yahise asaba Rwigema kutemera kujya muri Amerika. Ati “Nugenda, urugamba rushobora gusubikwa imyaka itanu yose.”

Yakomeje avuga ko “Yarabyanze, baranyohereza, nko kuvuga bati ‘Niba utagenda, uyu aragenda’ kubera ko batashakaga ko tugumana. Batekerezaga ko umwe nagenda, abandi bagira ibibazo. Ubwo barampamagaye, baravuga ngo ‘Fred yanze kugenda, ni wowe ugenda’. Navuze ko ntacyo bintwaye.”

Ingabo za RPA zarwanye urugamba rwo kubohora igihugu, zinahagarika Jenoside yakorewe Abatutsi

Umukuru w’Igihugu yasubiye kuganira na Rwigema, amubwira ko kugira ngo umugambi wabo uzakunde, we yemeye kujya muri Amerika, amwizeza ko urugamba nirutangira, azashaka uburyo ajya kwifatanya n’ingabo za RPA.

Yasobanuye ko yabwiye Fred ati “Batekereza ko bamenye umugambi wacu. Nimbyanga, baradufunga twembi. Rero kugira ngo tubirokoke, dukomeze umugambi wacu, uhagume ukomeze utegure ibyo dushaka gukora. Njyewe ndagenda ariko nibitangira, nzashaka inzira, ngaruke byoroshye. Ntabwo nzakenera uruhushya.”

Gen Maj Rwigema yiciwe ku gasozi ka Nyabwishongwezi mu karere ka Nyagatare tariki ya 2 Ukwakira 1990. Nyuma y’iminsi mike, Kagame wari ufite ipeti rya Major yavuye muri Amerika, ayobora uru rugamba.

Mu kiganiro na Soudan, Perezida Kagame yavuze ko ubwo yageraga ku rugamba yasanze ibintu byose byaravuye ku murongo. Yavuze ko ibyabaye atari kubishinja Rwigema kuko byose byabaye nyuma y’urupfu rwe, ahubwo ko byose byatewe n’uko hari ibintu bitahawe agaciro cyangwa ngo bikorwe uko byagombaga gukorwa kugira ngo urugamba rugende neza. Perezida Kagame yahise afata inshingano zo kuyobora ingamba ndetse ahindura n’isura y’urugamba, ibintu byatumye mu 1994 RPA itsinda ndetse igahagarika Jenoside yakorewe Abatutsi.

Ku wa 1 Ukwakira 1990 ni bwo Ingabo zahoze ari iza RPA zatangije urugamba rwo kubohora igihugu, ndetse ruza gushyirwaho akadomo muri Nyakanga 1994, zirutsinze.

Impamvu y’uru rugamba yari ishingiye ahanini ku karengane Abanyarwanda bari bamaze igihe bakorerwa mu buhungiro kuko bari barahejwe mu gihugu cyabo.

Tariki ya 1 Ukwakira 1990, umupaka wa Kagitumba wagabweho igitero. Cyabaye ikimenyetso cy’itangira ry’uru rugamba rwamaze imyaka ine nyuma y’uko abari bagize umuryango FPR Inkotanyi biyemeje kubohora igihugu hifashishijwe inzira y’intambara.

Ingabo za RPA, ishami rya gisirikare rya FPR-Inkotanyi, ku ikubitiro zari riyobowe na Gen. Maj Fred Gisa Rwigema. Ubutegetsi bwa Habyarimana bubifashijwemo n’abacanshuro, bwabashije gukoma mu nkokora RPA mu minsi ya mbere.

Mu gihe kingana n’iminsi 14 ya mbere y’urugamba, bamwe mu bayobozi bakuru ba RPA barishwe bitera icyuho gikomeye ubuyobozi ndetse na morali ijya hasi bikomeye mu basirikare hafi ya bose bari basigaye.

Umunsi wa kabiri w’uru rugamba, wari ukomeye bidasanzwe kuko Gen. Maj Gisa Fred Rwigema, yishwe arasiwe i Nyabwishongwezi tariki 2 Ukwakira 1990.

Perezida Paul Kagame muri icyo gihe wari Major yahise afata inshingano zo kuyobora urugamba, azana uburyo bushya bw’imirwanire n’izindi mpinduka nyinshi.

Tariki ya 3 Mutarama, RPA yahinduye isura y’imirwano igaba igitero gikomeye mu duce twa Gatuna na Kaniga mu rwego rwo kwima inzira ibikoresho by’ingabo za Leta. Ku ya 23 Mutarama 1991 RPA yafashe Umujyi wa Ruhengeri ifungura n’imfungwa zari zifungiye muri Gereza ya Ruhengeri zitwa Ibyitso.

Muri Mata mu 1994 icyari urugamba rwo kubohora igihugu cyaje kuvukamo urugamba rwo guhagarika Jenoside yakorewe Abatutsi, nyuma y’uko batangiye kwicwa ku wa 7 Mata.

Ku wa 8 Mata, Ingabo za RPA zafashe umugambi wo gutera Kigali, ndetse no guhagarika Jenoside mu maguru mashya. Ku wa 4 Nyakanga, RPA yabohoye Umujyi wa Kigali nyuma yo kubohora Butare ku ya 3 Nyakanga 1994. Guverinoma yari iriho yahise yerekeza mu buhungiro muri Zaire (Repubulika Iharanira Demokarasi ya Congo y’uyu Munsi).

Gen. Maj Fred Gisa Rwigema ni umwe mu bagize uruhare mu rugamba rwo kubohora igihugu

Fred Gisa Rwigema na Paul Kagame batangiye kugira igitekerezo cyo kubohora igihugu bakiri bato

Amafoto yaranze urugamba

Benshi mu basirikare ba RPA bari urubyiruko. Aha aba bafotowe ku wa 26 Gicurasi 1994 bari mu nzira bagana mu Mujyi wa Kigali

Ingabo za RPA ubwo zari i Kagitumba ku wa 22 Ukwakira 1990 mu ntangiriro z’urugamba rwo kubohora igihugu

Aba basirikare ba RPA bafotowe bari ahantu mu rutoki mu Mujyi wa Kigali mu gihe cy'urugamba rwo kubohora igihugu

Aha ni Ingabo za RPA ziri i Nyamata. Ku rugamba zabaga zifite uturadiyo tuzifasha kumenya amakuru y’uko urugamba rumeze. Radio Muhabura niyo zumvaga

Gen Maj Paul Kagame yakundaga kuvugana n'itangazamakuru agaragaza ko icyo ingabo ze zishaka ari ukugira uburenganzira ku gihugu, ko zigamije kurengera abanyarwanda bamaze imyaka myinshi bameneshwa

Ubwo Ingabo za RPA zahagurukaga ku Mulindi zerekeje muri CND

Hafi ya bose mu basirikare ba RPA babohoye u Rwanda, bari bakiri urubyiruko ubwo bajyaga ku rugamba. Bemeye guhara amashuri n'ubuzima buzira imihangayiko, maze bafata urugendo rwari rugoye ariko rwaganishije aheza u Rwanda

RPA yahereye ku busa, nta bikoresho, ntaho gukorera, ariko birangira igeze ku ntsinzi kubera kurwanira ukuri

Aho babaga bari hose barangwaga na morali. Aha ni hamwe mu ho ingabo za RPA zari mu masaha y'ijoro zimurikiwe n'itara rya peteroli

Morali ni kimwe mu byabongereraga imbaraga ntibite ku nzitizi ziri mu rugamba cyangwa ku kuba bagenzi babo batakaje ubuzima

Gen Major Paul Kagame byabaye ngombwa ko acikiriza amasomo ye, maze ava muri Leta Zunze Ubumwe za Amerika ayobora urugamba rwo kubohora igihugu kandi ingabo ze zirarutsinda

Bamwe mu basirikare ba RPA bari abarinzi ba Gen Major Paul Kagame barimo Mugisha Pepekale, Happy Ruvusha, James Kabarebe, Alex Kagame, Charles Kayonga na John Gasana wicaye

Nyuma yo kubohora igihugu hatangiye urugendo rwo kucyubaka, ubu ibintu byarahindutse, ahazwi nko kwa Lando ni uku hasaga ariko ubu huzuye imiturirwa

Rtd Col Ludovic Dodo Twahirwa wambaye ingofero itukura ni umwe mu bari bazi gushushanya uko urugamba rugomba kugenda

Amanywa n'ijoro, Ingabo za RPA zabaga ziri kwiga amayeri zakoresha ngo zitsinde urugamba, zirokore Abatutsi bicwaga umusubirizo

Bemeye guhara ubusore bwabo, biyemeza kujya gutabarira igihugu

Ingabo za RPA ubwo zageraga kuri CND ku Kimihurura ku Nteko Ishinga Amategeko maze zikarokora abatutsi hamwe n'abanyapolitiki ba FPR bari bahari

Lt. Gerald Mbanda (wahoze ari Umuyobozi ushinzwe Iterambere ry’Itangazamakuru mu Rwego rw’Igihugu rushinzwe Imiyoborere, RGB) ari kumwe na bagenzi be bakoraga kuri Radio Muhabura yari ishamikiye kuri RPA

Gen Maj Paul Kagame ari kumwe n’abandi banyamuryango ba FPR barimo n’abanyapolitiki nka Tito Rutaremara (iburyo)

Gen Maj Paul Kagame ubwo yarahiriraga inshingano zo kuba Minisitiri w'Ingabo nyuma yo kubohora igihugu

Nyuma y'urugamba rwo kubohora igihugu, Ingabo za RPA zakomeje ibikorwa byazo by'ubumuntu, zigashakisha ahari abarokotse bakavanwa aho bari bihishe, bakitabwaho

Ingabo za RPA ntizigeze ziheza impunzi zagiye zizigana

Kuva ku munsi wa Mbere, RPA yari ifite itsinda rifasha abandi basirikare gususuruka

Iyi ntama yari ifite batayo ibarizwamo, iyigumamo kugeza yishwe

Ingabo za RPA ubwo zari zimaze gufata Ikibuga cy'Indege cya Kigali

Gen Maj Paul Kagame ubwo yari ku Rusumo mu minsi ya mbere y'urugamba rwo kubohora igihugu

RPA yarwanaga urugamba inarokora Abatutsi bahigwaga, abageze mu maboko yayo bakiruhutsa

RPA yakajije urugamba kugeza Kigali ifashwe maze itangaza intsinzi

Bamwe mu basirikare ba RPA bakoraga kuri Radio Muhabura ubwo bari bicaye hanze bafata akaruhuko

Bamwe mu basirikare ba RPA barwanye urugamba rwo kubohora igihugu

Imigano yo mu Birunga yafashije ingabo za RPA kwigaranzura bikomeye ingabo za FAR

Bari bafite za mudasobwa nke bifashishaga mu kwandika cyangwa se mu gutanga amakuru nubwo zari nke

Rtd captain Daphrosa Intaramirwa ni umwe mu barwanye urugamba rwo kubohora igihugu, rwaranzwe n'ubutwari n'impuhwe za kibyeyi. Aha yari ateruye umwana wari umaze kurokorwa

Uyu musirikare ni umwe muri benshi bakoze ibikorwa by’ubutwari, bakarokora ubuzima bwa benshi uhereye ku bana bato. Aha hari i Kabgayi ku wa 25 Gicurasi 1994

Iyi foto yo ku wa 4 Nyakanga 1994 aho Umugaba Mukuru w'Ingabo za APR, Gen Maj Paul Kagame (uwo ibara ry’ubururu ryerekeyeho), ari kumwe n’abandi basirikare bari bageze mu Mujyi wa Kigali rwagati

Mu gihe cy'urugamba rwo kubohora igihugu, byari bigoye kubona n'aho abaganga bavurira inkomere. Icyo gihe bikingaga mu gihuru bagakora inshingano zabo kandi neza

Gen (Rtd) James Kabarebe ni umwe mu basirikare barwanye urugamba rwo kubohora igihugu, bagakomeza n'urw'iterambere ryacyo kugeza ubu

Ingabo za RPA ntizari zifite ibikoresho bizibashisha guhangana n'umwanzi ariko zari zifite ibitekerezo byazifashije kugera kure

Mukotanyi, ni impuzankano ifatwa nk'iy'amateka adasanzwe mu Rwanda

Abakobwa bemeye guhara ubuto bwabo biyemeza kwitangira igihugu

N'ibikomere ntibyababuzaga gukomeza urugamba

Iyi foto yafashwe nyuma gato yo guhagarika Jenoside yakorewe Abatutsl. Aha umusirikare wa RPA Inkotanyi yari i Kanombe aganira n'abasirikare ba Amerika bari mu Rwanda

Aba basirikare ba RPA bafotowe bari ahantu mu rutoki mu Mujyi wa Kigali mu gihe cy'urugamba rwo kubohora igihugu

Nta mikoro bari bafite ku buryo urugamba rwose barurwanye bapfundikanya ubushobozi. Aha bari mu nzira zigana mu Mujyi wa Kigali, bamwe bikoreye udusanduku dutwarwamo amasasu

Iyo foto igaragaza umusirikare wa RPA ari mu nkengero za Byumba ahari imbunda ya Machine gun. Hari ku wa 17 Mata 1994

Uyu musore ukiri muto, ni umwe mu bemeye guhara ubusore bwabo bagahitamo kwitangira igihugu. Aha yafotorewe i Byumba ku wa 7 Mata 1994

Uyu yafotorewe i Byumba nyuma gato y’ihanurwa ry’indege ya Habyarimana

Uyu musirikare yafotorewe hafi y’i Nyanza mu ntangiriro za Kamena. Yari afite agasanduku karimo amasasu

Ubwo Ingabo za FPR Inkotanyi zari zimaze gufata Umujyi wa Kigali nibwo ubuzima bwashushe n’ubugaruka mu gihugu

Iyi foto ya Gen Maj Paul Kagame yafashwe ku wa 11 Gicurasi 1994 ari i Byumba. Icyo gihe yari mu nama na Jose Ayala Lasso wari ukuriye ishami rya Loni rishinzwe uburenganzira bwa muntu

Ku wa 02 Kamena 1994 ubwo Ingabo za RPA zari mu rugendo mu nzira zigana i Nyanza. Icyo gihe zarwanye inkundura n’ingabo za FAR

Uyu musirikare wa FPR yari ari kunyura mu nzira muferege wari waracukuwe wifashishwaga nk'inzira. Aha ni i Byumba

Ibikoresho bike bari bafite, babikoresheje kimwe mu bikorwa by'ubutwari mu mateka y'u Rwanda

Iyi foto yafatiwe mu Majyepfo y’u Rwanda ubwo ingabo za RPA zari zirimbanyije urugamba rwo kubohora igihugu. Ahantu henshi zagendaga n’amaguru kubera kubura ubushobozi

Bamwe mu basirikare ba RPA bafotowe bahagaze kuri umwe mu mihanda y’i Kigali ku wa 26 Gicurasi 1994

Uyu musirikare wa RPA yafotorewe i Byumba mu ntangiriro za Mata 1994

Barwanye urugamba bafite icyizere ko bazarutsinda ku buryo ibyo ubwabyo byabongereraga akanyamuneza mu mutima

Umunsi ku wundi nubwo babaga bari mu bizazane, morale yabaga iri hejuru