Nubwo byavugwaga ko Igihugu cya Uganda kiri mu bihugu byihagije mu biribwa muri aka karere , ubushakashatsi bwakozwe n’ikigo gishinzwe umutungo cyitwa (EPRC) Economic Policy Research Centre, 30% by’abaturage b’icyo gihugu bugarijwe n’ikibazo cyo kutihaza mu biribwa bitewe n’umubare munini w’abaturage bakomeje kwiyongera, ndetse n’ubutaka bumaze gucukuka.

Iyi nyigo yakozwe n’uyu muryango, igaragaza ko umusaruro igihugu cya Uganda kibona bigaragara ko uri munsi y’ubwiyongere bw’abaturage bacyo.

Mu nama yabaye kuri uyu wa kane, i Kampala muri Uganda, Umuyobozi mukuru w’uyu muryango Dr Sarah Ssewanyanayavuze ko ko umubare w’abaturage muri iki gihugu urimo kwiyongera ku kigereranyo cya 3.2% buri mwaka ugereranyije na 2.7% ku bwiyongere bw’ibiribwa buri mwaka, bityo akavuga ko ubuzima bushobora kurushaho kuba bubi.

Uyu muyobozi yakomeje atangariza ikinyamakuru The Monitor ko kugabanuka kw’ibiribwa muri iki gihugu guterwa n’uko ubutaka buhingwaho gucukuka

Yavuze ko muri icyi gihugu, imirima 8 ku mirima 100 ariyo yonyine ikoreshwamo amafumbire, naho abantu 26 ku100 bakaba aribo bonyine bakoresha ifumbire mu gihe baba bagiye guhinga.

Icyegeranyo cy’uyu muryango, cyerekana kandi ko hagati muri Uganda ariho bagerageza gukoresha ifumbire naho wajya mu majyaruguru bakaza ku mwanya wa nyuma mu gukoresha ifumbire.

Umuyobozi w’uyu muryango atanga inama kuri leta ya Uganda avuga ko mu rwego rwo guhangana n’iki kibazo cy’ubutaka, hagomba kongerwa uburyo bwo gukoresha ifumbire, ndetse na leta igafasha abaturage kubona inguzanyo ku bahinzi no kongera amahugurwa kubyerekeranye no guhinga kijyambere.