Ibigo birimo Qatar Airlines, Turkish Airlines, Ethiopian Airlines, Emirates na FlyDubai nibyo byabimburiye ibindi bitangaza ingengabihe yabyo y’ingendo guhera muri Kamena kugeza muri Nyakanga hirya no hino ku Isi.

Qatar Airways na FlyDubai kandi nibyo bigo bya mbere byo mu Burasirazuba bwo hagati, byatangaje ko bigiye gutangiza ingendo zerekeza muri Tanzania muri uku kwezi, mbere y’uko ibindi bigo nabyo bitangira kwerekezayo.

Ethiopian Airlines nicyo kigo cya mbere muri Afurika cyatangije ingendo zerekereza muri Tanzania. Indege yacyo yageze muri iki gihugu tariki 1 Kamena, nyuma y’aho iki gihugu gitangiye kwemerera ba mukerarugendo kwerekezayo.

Tariki 8 uku kwezi, Perezida John Pombe Magufuli nibwo yatangaje ko iki gihugu kitakirimo Coronavirus kubera amasengesho y’abaturage bacyo.

Ubwo yari mu rusengero mu Mujyi wa Dodoma, Magufuli yabwiye abakirisitu ati "Imana ishimwe ko icyorezo cya Coronavirus twagitsinze".

Gusa Ishami ry’Umuryango w’Abibumbye rishinzwe ubuzima ku Isi (OMS), ryatangaje impungenge ritewe n’uburyo leta yitwara kuri iki cyorezo.

Tanzania kandi yahagaritse gutangaza amakuru y’uko iki cyorezo gihagaze mu gihugu.

Tariki 29 z’ukwezi kwa Kane, nibwo iheruka gutangaza amakuru kuri iki cyorezo, icyo gihe hari abayanduye 509 na 21 yishe.

Mu Cyumweru gishize, Minisitiri w’Ubuzima yemeje ko mu bitaro byo muri Dar es Salaam hari hasigaye abarwayi bane gusa.

Ubuyobozi bwa Qatar Airlines buvuga ko ingendo zizatangira tariki 16 Kamena, zikazaba arizo za mbere ikoze zerekeza kuri uyu mugabane kuva yazihagarika muri Werurwe kubera icyorezo cya Coronavirus.

Ubuyobozi bw’iki kigo buvuga ko buzajya bukora ingendo eshatu mu Cyumweru, ku wa Kabiri, ku wa Kane no ku wa Gatandatu, zikazajya zihuza Doha muri Qatar n’Umujyi wa Dar es Salaam.

Umuyobozi wa Qatar Airways, Akbar Al Baker, yatangaje ko gusubukura ingendo zerekeza i Dar es Salaam, ari uko uyu ari umwe mu Mijyi minini kandi ukaba Umujyi w’ubucuruzi n’ubukerarugendo muri Afurika y’Iburasirazuba.

Mu rwego rwo kubungabunga umutekano w’abagenzi, iyi sosiyete yavuze ko yarushijeho kunoza ingamba z’umutekano mu ndege no ku bagenzi ndetse n’abakozi.

Yavuze kandi ko yashyizeho impinduka nyinshi, harimo no gushyiraho ibikoresho byo kurinda umuntu ku giti cye, ku bakozi b’indege igihe bari bayirimo ndetse na serivisi zahinduwe zigabanya imikoranire hagati y’abagenzi n’abakozi.

Usibye Dar es Salaam, Qatar Airways yavuze ko izakomeza ingendo zahagaritswe i Berlin, New York, Tunisia, na Venice mu Butaliyani mu gihe izongera serivisi i Dublin muri Ireland, Milan na Roma mu ndege za buri munsi.

Ishyirahamwe Mpuzamahanga rishinzwe gutwara abantu n’ibintu mu Kirere, IATA, riheruka gutangaza ko ibigo mpuzamahanga bitwara abagenzi mu ndege bizahomba miliyari $113 mu gihe Coronavirus yakomeza gukwirakwira.

Qatar Airways igiye gusubukura ingendo muri Tanzania