Abayobozi babiri bo mu rwego rw’ubuzima muri RDC babwiye Reuters ku wa 15 Ukwakira 2026 ko muri Nord-Ubangi hamaze kwemezwa abantu babiri banduye Ebola.

Iki cyorezo cyo mu bwoko bwa Bundibugyo cyatangajwe bwa mbere muri Gicurasi 2026, kikaba ari icya kabiri gikomeye kurusha ibindi byigeze kwibasira RDC. Kugeza ubu, hamaze kwemezwa abarenga 9100 banduye, mu gihe abarenga 4400 bamaze gupfa.

Ituri ni yo ikiri izingiro ry’iki cyorezo, ariko imibare y’abandura iri no kwiyongera muri Kivu y’Amajyaruguru. Ebola kandi yagaragaye muri Kivu y’Amajyepfo, Tshopo, Haut-Uélé, Bas-Uélé na Sud-Ubangi.

Umuyobozi wo mu rwego rw’ubuzima muri Nord-Ubangi yavuze ko mbere yo kwemeza ko abantu babiri banduye Ebola, hari hamaze iminsi hagaragara impfu zidasanzwe mu gace gacukurwamo amabuye y’agaciro ka Wapinda, hafi ya Bas-Uélé.

Ibyo ni byo byatumye hafatwa ibipimo byoherezwa gusuzumwa muri laboratwari yo ku rwego rw’intara n’i Kinshasa.

Iki cyorezo kandi cyamaze kurenga imipaka ya RDC. Uganda yigeze kugaragaramo Ebola ariko itangazwa nk’igihugu kitakirangwamo iki cyorezo muri Kanama 2026.

Kenya na yo yatangaje umuntu wa mbere wanduye mu ntangiriro z’Ukwakira, nyuma yaho hemezwa uwa kabiri wo mu muryango we.