00:00:00 IGIHE NETWORK KN KINYARWANDA EN ENGLISH FR FRANCAIS

Abagize umuryango w’ibwami bw’aba-Zulu bari kurwanira ingoma

Yanditswe na Muhonzire Sylvine
Kuya 8 Gicurasi 2021 saa 07:53
Yasuwe :
0 0

Nyuma y’urupfu rw’umwami w’aba-Zulu, Goodwill Zwelithini, rwabaye muri Werurwe uyu mwaka n’urw’umwakazi, Mantfombi Dlamini-Zulu, mu mpera za Mata, abagize umuryango w’ibwami batangiye gusubiranamo buri wese yifuza gusigarana ingoma.

Abari gusubiranamo ni abagize umuryango w’ibwami harimo abavukana nawe n’abagore bandi b’umwami nyuma y’uko uwari warasigiwe ubutware bwo kuyobora ubwami bw’aba-Zulu, umwamikazi Dlamini Zulu atanze atarimikwa.

BBC itangaza ko hari gukwirakwizwa ibihuha bivuga ko uyu mwamikazi yaba yararozwe kugira ngo adasigarana ubwami cyane ko atari umu-Zulu ahubwo ari mushiki w’umwami Mswati III wa eSwatini.

Gusa kuba ari mushiki w’uyu mwami nibyo byatumye umwami Zwelithini ahitamo kumusigira ingoma y’aba-Zulu kuko yifitemo amaraso y’abami.

Iminsi mike nyuma y’urupfu rw’umwami Zwelithini, abavandimwe be bavukana bashinjwe gukora inama rwihishwa, kuko batari bashyigikiye ko umwamikazi Dlamini-Zulu asigarana ingoma.

Amakuru y’uko habaye iyi nama yateje urunturuntu mu bagize umuryango w’ibwami bakeka ko bizateza amacakaburi. Gusa abavandimwe b’umwami bahakanye ko nta gikorwa kibi bari bari gutegura ahubwo ko bari bari kuganira uko bazafasha umwamikazi Dlamini-Zulu wari ugiye gusigarana ingoma.

Aba bavandimwe barimo igikomangoma Mbonisi n’igikomangomakazi Thembi bitandukanyije n’abavuga ko bafite uruhare mu rupfu rwe.

Uyu mwamikazi w’imyaka 65 amaze gutanga, amahirwe y’uzazungura ingoma yahawe umuhungu we mukuru, igikomangoma Misizulu, ufite imyaka 46 warangije amashuri ye muri Leta Zunze Ubumwe za Amerika. Gusa ntabwo umuryango w’ibwami urabyemeza nubwo mama we amaze icyumweru kirenga atanze.

Impamvu y’uku kurwanira ubwami no gusubiranamo kwaturutse ku kuba nta buryo buhamye ingoma y’aba-Zulu ifite y’usimbura umwami igihe atanze, nk’uko mu Bwongereza bimeze, ahubwo uzazungura umwami ahitwamo n’umwami uriho.

Kugeza ubu ntiharamenyekana uburyo intonganya hagati y’abagize umuryango w’ibwami zizakemurwa n’igihe umwami azerekanwa. Ariko ab’ibwami bari gusabwa gucisha make, umwami mushya uzimikwa, akimikwa mu mahoro kandi mu buryo bwubashywe.

Umwami Zwelithini yatanze afite abana 28 yabyaye ku bagore batandatu. Abo yabyaranye n’umwamikazi Dlamini Zulu ni umunani.

Umwamikazi Dlamini-Zulu bivugwa ko yatanze yiyahuye / Ifoto: Getty Images
Abagore b'umwami Zwelithini mu kiriyo cye /Ifoto: EPA
Umwami Zwelithini yatanze amaze imyaka 50 ku ngoma / Ifoto: Getty Images
Igikomangomakazi Thembi mushiki w'umwami Zwelithini yahakanye ko we n'abavandimwe be batigeze bacura umugambi wo guhirika umwamikazi Dlamini-Zulu / Ifoto: Africa News Agency
Mu 1970 mbere y'imyaka irindwi ngo ashyingiranwe n'umwami w'Abazulu /Ifoto: Getty Images

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .