Kuri iki cyumweru, abarwanyi 84 ba FDLR bashyize intwaro hasi mu Burasirazuba bwa Repuburika Iharanira Demukarasi ya Congo, mu gihe uyu mutwe uri mu minsi yawo ya nyuma wahawemo nyirantarengwa ngo ube washyize intwaro hasi.

Visi Guverineri w’Intara ya Kivu y’Amajyaruguru, Feller Lutaichirwa, yatangarije Ibiro Ntaramakuru by’Abafaransa (AFP) ko abarwanyi 84 bari kumwe n’imiryango yabo igizwe n’abana n’abagore babo 34 bashyize intwaro hasi, mu ahitwa Buleusa mu gace ka Walikale.

Uretse aba kandi, uyu Muyobozi muri Leta ya Congo yatangaje ko hari n’abandi barwanyi 17 bari mu nzira berekeza i Buleusa, nyuma yo gushyira intwaro hasi.

Abashyize intwaro hasi bitanze bambaye gisivili, batanga intwaro 37 harimo inini enye.

Nubwo uyu mutwe ugaragaza ko uri mu gikorwa cyo gushyira intwaro hasi, nta muyobozi n’umwe wa FDLR wari wumvikana ko yashyize intwaro hasi.

Bamwe mu barwanyi ba FDLR (Kanama 2013)

Uretse kuba nta muyobozi muri uyu mutwe wari washyira intwaro hasi, imibare ivugwa ku bantu bagize uyu mutwe wa FDLR ( bagera ku 2000 harimo abarwanyi n’imiryango yabo), abagaragaje ko bashyize intwaro baracyari bake.

Abashyize intwaro hasi mu bihe bishize bagiye gucumbikirwa mu nkambi i Kisangani.

Umutwe wa FDLR wahawe nyirantarengwa y’itariki ya 2 Mutarama 2015 kuba washyize intwaro hasi, bitakorwa bakagaho ibitero bikaze bya gisirikare.

[email protected]