Imibare ikubiye muri raporo y’itsinda rishinzwe kurwanya Ebola yashyizwe ahagaragara ku wa 25 Nzeri igaragaza ko ku wa 24 Nzeri habonetse abarwayi bashya 56, mu gihe umunsi wabanje bari 70. Ni igabanuka rya 20%, ariko inzego z’ubuzima zigaragaza ko hakiri imbogamizi mu guhangana n’icyorezo.

Igabanuka ry’abarwayi bashya ryagaragaye cyane muri Kivu y’Amajyaruguru, aho bavuye kuri 31 bagera kuri 17 mu masaha 24. Muri Ituri ho bariyongereye bava kuri 31 bagera kuri 35. Iyo ntara yihariye 76,4% by’abamaze kwandura bose. Muri Haut-Uélé habonetse abarwayi bashya batatu, naho muri Bas-Uélé haboneka umwe.

Raporo igaragaza ko abantu 2.001 bamaze gukira, barimo 35 bakize ku wa 24 Nzeri, mu gihe abandi 848 bari mu kato. Mu duce 62 dushinzwe ubuzima twigeze kubonekamo nibura umurwayi umwe, 56 two mu ntara esheshatu turacyafite abarwayi.

Nubwo umubare w’abandura bashya wagabanutse, abantu benshi baracyapfira hanze y’ibigo bivurirwamo Ebola. Mu bantu 34 bapfuye mu masaha 24, 23 bapfiriye aho batuye, barimo icyenda bo muri Mandima muri Ituri na barindwi bo muri Beni muri Kivu y’Amajyaruguru. Beni yanabonetsemo 12 muri 17 banduye bashya muri iyo ntara.

Gukurikirana abahuye n’abanduye na byo byagabanutse: Igipimo cyabyo cyavuye kuri 83,4% kigera kuri 79,2% mu munsi umwe, naho muri Tshopo kigera kuri 34,8%. Ibi bishobora gutuma abantu banduye batamenyekana hakiri kare.

Ibikorwa byo kurwanya Ebola bibangamiwe kandi n’ibura ry’ibikoresho, gukingira bitihuta n’ibigo bimwe bivurirwamo abarwayi bitujuje ibisabwa. Muri Kivu y’Amajyaruguru, abarwayi 114 baracyavurirwa muri ibyo bigo. I Bunia, abantu 135 bakingiwe mu masaha 24, mu gihe intego ari 300 ku munsi.

Inzego z’ubuzima zasabye ko hakazwa igenzura ku mipaka ihuza RDC na Sudani y’Epfo, ndetse n’imyiteguro mu ntara ziri ku ruzi rwa Congo, kugira ngo hirindwe ko icyorezo gikomeza gukwirakwira.

Abanduye Ebola muri RDC barasatira 8.000