Mu Mujyi wa Nairobi kuri uyu wa Mbere, amaduka menshi yari afunguye nkuko bisanzwe mu gihe Odinga yari yasabye abaturage ko bakora imyigaragambyo.

Nibura abantu 24 nibo babarurwa kuba barapfuye mu mvururu zakurikiye amatora y’Umukuru w’Igihugu muri Kenya yasize byemejwe ko Perezida Uhuru Kenyatta ariwe wongeye gutorwa.

Odinga yavuze ko aya matora yabaye ku wa 8 Kanama 2017 yibwe kugira ngo Perezida Uhuru Kenyatta yongere gutorerwa kuyobora iki gihugu cyo mu Burasirazuba bwa Afurika.

Uyu mugabo utavuga rumwe na Kenyatta, yari yasabye abaturage ko bakwigaragambya kugira ngo bahe icyubahiro abantu 24 baguye muri ibi bikorwa byakurikiye amatora.

Gusa ariko, abanyakenya bakoresha Twitter bifashishije Hashtag bise #TurudiKaziniChallenge (reka dusubire ku kazi) basaba bagenzi babo gukomeza imirimo yabo nkuko bisanzwe.

Perezida Uhuru Kenyatta watorewe kongera kuyobora Kenya mu myaka itanu iri imbere, yabwiye abaturage b’iki gihugu ko bakwimakaza amahoro bakareka kurwana.

Ati “Twese turi abanyakenya, ntidukwiye kurwana, ntabwo dukwiye kwangiza imitungo y’abandi, ntidukwiye gutwara ubuzima bw’abandi.” Yakomeje avuga ko abaturage b’iki gihugu bavuze ko amatora yarangiye, ubu benshi bakaba basubiye mu mirimo yabo.

Ibi bibaye mu gihe abaturage biganjemo abakiri bato bigaragambije bamagana ibyavuye mu matora, aho batwitse amapine mu mijyi itandukanye nka Kibera, Nairobi n’ahandi.

Hari abashyigikiye Odinga babwiye BBC ko nubwo bemeranya nawe ko amatora yibwe, badashobora kureka gukora ibikorwa byabo by’ubucuruzi bahitamo gufungura amaduka.

Amaduka yongeye gufungura nkuko bisanzwe