Amagana y’Abanyakenya kuri uyu wa 11 Kamena 2013 bigaragambirije imbere y’Inteko Ishinga Amategeko mu Mujyi wa Nairobi, bitwaje ingurube z’ibibumbano zahawe izina ry’ingurube zishonje "avides cochons".

Ku nshuro ya kabiri iyi myigaragambyo ibaye; ikorwa n’abaturage binubira iyongezwa ry’imishahara y’Abadepite. Iya mbere yabaye hagati mu kwezi kwa Gicurasi 2013, abayitabiriye bari bitwaje ingurube 12 nzima na litiro 24 z’amaraso y’amatungo banyanyagijwe imbere y’Inteko Ishinga Amategeko nyuma bohereza ingurube zijya kuyarigata.

Inkuru ya Jeuneafrique, ivuga ko kuri uyu wa kabiri na none baje bitwaje amaraso, bafite n’ibipapuro byanditseho ngo “MPigs” bashaka kuvuga ngo Abadepite b’ingurube.

Abigaragambyaga kandi bari bateruye ikigurube kinini gikozwe mu myenda cyaje guterekwa imbere y’Inteko Ishinga Amategeko.

Ubusanzwe Abadepite bo muri Kenya bari mu ba mbere bahembwa neza muri Afurika kandi ntibishyura imisoro. Umushahara w’Umudepite muri Kenya ukubye inshuro 90 by’umushahara fatizo wo muri icyo gihugu.

Ikibumbano cy'ingurube abigaragambyaga muri Kenya bitwaje