Abanyarwanda icyenda bakomerekeye bikomeye mu mpanuka yakozwe n’imodoka ya Kampala Coach.

Iyi mpanuka yabereye mu muhanda Lyantonde-Mbarara abari bayirimo babiri bahise bapfa ako kanya, ariko nta Munyarwanda byatangajwe ko yayiguyemo nk’uko Tubikesha The New Times.

Minisiteri y’Ubuzima mu ijoro ryo kuri uyu wa Kabiri yohereje imbangukiragutabara kujya kuzana abo Banyarwanda bakomerekeye muri iyo mpanuka.

Iyi modoka yakoze impanuka yaturukaga i Nairobi muri Kenya, uretse Abanyarwanda yanakomerekeyemo bikomeye abandi bagenzi 18.

Mbere y’uko Minisiteri y’Ubuzima yohereza imbangukiragutabara kuzana Abanyarwanda bakomerekeye muri iyo mpanuka, Minisiteri w’Ubuzima, Dr Agnes Binagwaho, yabwiye New Times ko abakomeretse bakiriwe ku Bitaro bya Mbarara.

Umuvugizi wa Polisi ya Uganda, Fred Enanga, yatangaje ko iyi mpanuka yatewe n’umuvuduko ukabije, hakiyongeraho n’umunaniro.

Yagize ati “Turakeka ko umushoferi yihutaga cyane, ananirwa gukata mu ikoni.”

Enanga yatangaje ko iyi modoka yari itwawe n’umushoferi w’Umunyatanzaniya, akaba ari muri babiri bahise bapfa.

Undi wahise apfa bivugwa ko ari umugore w’Umunya Uganda.

Nathan Mugume ukuriye Ishami ry’irumanaho muri Minisiteri y’Ubuzima, Nathan mugume yabwiye IGIHE mu gitondo cyo kuri uyu wa Gatatu ko aba Banyarwanda bamaze kugezwa mu Bitaro byo mu Rwanda.

[email protected]