Afurika ni umugabane wa kabiri munini ku Isi, ikaba n’uwa kabiri utuwe cyane kandi ufatwa nk’ukennye cyane kurusha iyindi. Benshi mu baperezida n’abami bayoboye ibihugu bya Afurika bamaze igihe kinini ku butegetsi; bamwe muri bo bakungahaje imiryango yabo binyuze mu nzira z’amahugu no kunyereza imitungo.

Ikinyamakuru The Richest Lifestyle kivuga ko bamwe mu baperezida b’ibihugu bya Afurika bakijijwe n’imitungo kamere y’ibihugu bayoboye binyuze mu bigo by’ubucuruzi banditse ku mazina y’abagize imiryango yabo.

Aba ni bamwe mu ba perezida n’abami b’ Afurika bakize kurusha abandi mu 2014 ku bw’ikinyamakuru Forbes:

9. Robert Mugabe – Miliyoni 10 z’Amadorali

Igihugu: Zimbabwe Imyaka amaze ku butegetsi: 26

Robert Mugabe ni Perezida wa Zimbabwe. Umutungo we ubarirwa muri miliyoni 10 z’amadorali. Umuryango we urakize cyane. Mugabe yatsinze amatora inshuro nyinshi, nubwo akenshi yagiye ashinjwa n’amahanga kwiba amajwi.

8. Idriss Deby- Miliyoni 50 z’amadorali

Igihugu: Tchad, Imyaka amaze ku butegetsi: 24

Idriss Deby yayoboye Tchad kuva mu 1990. Afite umutungo ubarirwa muri miliyoni 50 z’amadorali. Mu mpere za Kanama 2006, yatabarije igihugu cye cyavanaga amafaranga make mu bucukuzi bwa peteroli amenshi akinjizwa n’ibigo byo mu mahanga bicukura peteroli muri Tchad.

6) Goodluck Jonathan – Miliyoni 100 z’amadorali

Igihugu: Nigeria, Imyaka amaze ku butegetsi: 4

Goodluck Jonathan uyoboye Nigeria muri iki gihe atunze amadorali akabakaba miliyoni 100. Yatangije impinduka mu bucuruzi bw’umuriro w’amashanyarazi n’ubucukuzi bwa Peteroli na gahunda zo guhanga udushya no kwihangira imirimo muri Nigeria.

6) Umwami Mswati III – Miliyoni 100 z’amadorali

Igihugu ayoboye: Swaziland, Imyaka amaze ku butegetsi: 28

Ikinyamakuru Forbes kivuga ko Mswati ari we mwami wa 15 ukize mu Isi. Imitungo ye ibarirwa hagati ya miliyari 100 na 200 z’amadorali.

Yagiye anengwa gusesagura. Mu 2009, benshi mu bagore be 13 batagaguje miliyoni 6 z’amadorali bahaha mu maduka.

Muri uyu mwaka, Inteko Ishinga Amategeko yamugeneye miliyoni $61 zo gukoresha we n’umuryango we.

Mu gihe Abaswazi 63 % babayeho nabi, imodoka ze zirimo izigura ibihumbi 500$ nubwo yabujije kugira uwazifotora.

5. Paul Biya -Miliyoni 200$

Igihugu ayoboye: Cameroun, amaze ku butegetsi imyaka31

Paul Biya yayoboye Cameroun kuva mu kuwa 6 Ugushyingo 1982. Atunze imari ikabakaba miliyoni 200$. Umuryango wa Kiliziya Gatolika Urwanya Inzara (CCFD) n’indi miryango yigenga yamushyize ku rutonde rw’abayobozi bakize binyuze mu buriganya.

Mu 2009, Biya yari ayoboye urutonde rw’abayobozi basesagura cyane iyo bari mu biruhuko. Ikinyamakuru Rue 89 kivuga ko yakodeshaga inzu ku madorali 40.000 ku munsi.

4) Uhuru Kenyatta – Miliyoni 200$

Igihugu ayoboye: Kenya, amaze umwaka umwe ku buyobozi

Uhuru Muigai Kenyatta ni umwana wa Perezida wa mbere wa Kenya Jomo Kenyatta. Mu 2011, ikinyamakuru Forbes cyabariye umutungo we muri miliyoni 500 z’amadorali.

Hamwe n’umuryango we, Kenyatta afite ikaragiro ry’amata, Brookside Dairies, rikomeye cyane mu Mujyi wa Nairobi, ikigo cy’tangazamakuru, Mediamax, Banki y’Ubucuruzi ya Afurika (CBA).

3.Teodoro Obiang Nguema Mbasogo – Miliyoni 600$

Ayoboye igihugu cya Guinee Equatorial, amaze imyaka 34 ku butegetsi.

Teodoro Obiang Nguema Mbasogo yagiye ku butegetsi mu 1979 abuhiritseho nyirarume Macias Nguema .

Imitungo ye irenga miliyari 600$, nubwo Guinee Equatorial kiri mu bihugu bikize muri Afurika, benshi mu bagituye baba mu bukene.

2) Mohammed VI wa Maroc – Miliyari 2.5 $

Ayoboye igihugu cya Maroc, amaze imyaka 15 ku butegetsi

Mohammed VI ni we mwami uganje mu gihugu cya Maroc kuri ubu. Ni nawe mucuruzi ukomeye muri icyo gihugu. Afite imitungo ya miliyari 2.5$. Yimitswe nyuma y’Urupfu rwa se mu 1999.

1) Jose Eduardo dos Santos – miliyari 20

Amaze imyaka 34 ayoboye igihugu cya Angola

Eduardo dos Santos yayoboye Angola kuva mu 1979, imitungo ye irenga miliyari 20$

Umukobwa we Isabel dos Santos nawe ari mu baherwe bakomeye muri Afurika na miliyari 3.8$ ni we mugore wa mbere ukize kurusha abandi muri Afurika, akaba ari nawe mugore w’umwirabura ukize cyane ku Isi .

Imitungo ya bamwe mu bakuru b’ibihugu bya Afurika ntiramenyekana kugeza ubu kuko bakora ubucuruzi rwihishwa babwanditse ku miryango yabo.