Abacukura amabuye y’agaciro muri Afurika y’Epfo bagera kuri 500 barokowe mu kirombe bacukuragamo zahabu ku Cyumweru tariki 22 Gashyantare.

Inkogi y’umuriro ikomeye yagaragaye mu kirombe cy’amabuye y’agaciro cya Kusasalethu mu birometero bibiri uvuye mu Majyaruguru y’Umujyi wa Johannesburg ndetse kikaba kinafite ibirometero 3.5 z’ubujyakuzimu.

Abahagarariye Ikigo cy’Ubucukuzi Harmony Gold, ari na yo nyiri iki kirombe, batangaje ko batabaye abagabo bagera kuri 486 bari bakoze uwo munsi.

Amakuru dukesha ibitangazamakuru bitandukanye avuga ko uwo muriro wagaragaye mu gihe umurimo wo gutunganya ayo mabuye wari urimbanyije.

Umwaka ushize iki kirombe cyari cyahagaritswe mu rwego rwo guhangana n’abacukura aya mabuye batabifitiye uburenganzira, binakekwa ko baba ari bo ba nyirabayazana b’iyi nkongi y’umuriro yari yivuganye imbaga nyamwinshi gusa ubutabazi bukabonekera igihe.

Bivugwa ko impanuka zikomeye mu birombe zimaze kuba akarande muri Afurika y’Epfo kuko muri Gashyantare 2014 abacukuzi icyenda baguye mu kirombe nyuma y’umuriro ututse ikuzimu mu kindi kirombe cya Harmony Gold Mine Giherereye mu Burengerazuba bwa Johannesburg.

Na none kandi mu mwaka wa 2009 abagera kuri 82 barimo bacukura zahabu mu buryo butemewe n’amategeko ahantu har hararetswe n’ababifitiye ububasha, bishwe n’umuriro waturutse ikuzimu. Muri uyu mwaka, hari abandi bakozi icyenda bishwe n’ikirombe cyabagwiriye bacukuramo ubutare bwa platinum.