Itangazo ryaraye risohowe na Perezidansi ya Afurika y’Epfo rivuga ko Gordhan asimburwa na Malusi Gigaba, naho Sfiso Buthelezi akaba Minisitiri w’imari wungirije asimbuye Mcebisi Jonas.

Rigaragaza kandi ko Perezida Zuma yakoze izindi mpinduka muri Guverinoma, aho yavuze ko yashyizeho abaminisitiri n’ababungirije bashya kugirango bakorane na bagenzi babo mu gukora impinduka zigamije imibereho n’ubukungu by’abaturage, bibanda ku buzima bwiza bw’abakene n’abakozi.

Mu Ukwakira umwaka ushize Gordhan yaketsweho ibyaha bya ruswa nyuma biza gukurwaho, nubwo we yavugaga ko byihishwe inyuma n’impamvu za politiki.

BBC yanditse ko ishyaka ry’Aba-Communist rivuga rumwe n’iriyoboye, ANC, riherutse kugaragaza ko ryitandukanyije n’umugambi wo kwirukana Gordhan. Ibi kandi bikaba bidashyigikiwe na benshi mu bakomeye mu ishyaka riri ku butegetsi.

Muri iki cyumweru Perezida Zuma yahamagaje igitaraganya Gordhan wari witabiriye inama mu Bwongereza. Muri iki gihugu ifaranga ryataye agaciro ku mpuzandengo ya 5% ugereranyije n’andi mafaranga mpuzamahanga.

Minisitiri Gordhan yigeze gukekwaho gukora ubugenzuzi kuri Perezida Zuma n’abandi bayobozi muri politiki yifashishije itsinda yashyizeho kumufasha ryakoreraga mu biro bye. Gusa ibi yarabihakanye.

Pravin Gordhan yavutse tariki ya 12 Mata mu 1949 ahitwa Durban muri Afurika y’Epfo, yari Minisitiri w’Imari, umwanya yagiyeho avuye ku mwanya wa Minisitiri ushinzwe amakoperative kuva 2009 kugeza 2014.