Guverinoma y’iki gihugu yatangaje ko nubwo iyi virusi yandura cyane kurusha izindi coronavirus zose zihinduranyije, imibare y’abarembywa n’abahitanwa na yo itigeze yiyongera nk’uko BBC yabitangaje.

Itangazo ryasohowe n’inama y’Abaminisitiri yo muri Afurika y’Epfo yagaragaje ko imibare y’abandura yagabanutse ku kigero cya 25%. Mu cyumweru cyarangiye ku itariki 25 Ukuboza 2021 handuye abantu 89.781 bavuye ku 127.753 bari banduye mu cyumweru cyabanje.

Ibi byatumye ingamba zoroshywa, bwa mbere kuva muri Werurwe 2020 abantu bemererwa gukora ingendo amasaha 24, utubari duhabwa uburenganzira bwo gucuruza amasaha yose tuvuye kuri saa tanu zijoro twari twarashyiriweho ndetse abantu bemererwa guterana kugera kuri 50% by’ubushobozi bw’aho bateraniye.

Iki gihugu cyasabye ko abantu bakomeza gukurikiza amabwiriza yose ya Covid-19, bagafata inkingo ndetse gishishikariza ababyeyi gukingiza abana bari hejuru y’imyaka 12.

Nubwo muri Afurika y’Epfo bagaragaje ko bari gukiruka virus ya Omicron ibindi bihugu bikomeje gushyiraho ingamba zikakaye zo kurinda ikwirakwira ryayo.

Kuva Covid-19 yagera muri iki gihugu hamaze kwandura hafi miliyoni 3.5 ndetse abarenga ibihumbi 90 imaze kubahitana.