Uru rukingo ruzwi nka ChAdOx1 nCoV-19 ruratangira kugeragezwa mu minsi ya vuba ku bufatanye bw’iyi kaminuza ya Oxford n’iyo muri Afurika Y’Epfo yitwa University of Witwatersrand.

Impamvu izi mpuguke zahisemo kugeragereza uru rukingo muri Afurika y’Epfo ni uko ari kimwe mu bihugu ubu bifite ubwandu bushya bwinshi, bityo bikazatuma babasha kumenya ingufu rufite mu gukingira umuntu ngo atandura.

Impuguke mu bijyanye n’inkingo akaba n’umwarimu muri University of Witwatersrand, Shabir Madhi yavuze ko hatangiye gutoranywa abazakorerwaho iri gerageza.

Yagize ati “Mu cyumweru gishize twatangiye guhitamo abazakorerwaho igerageza ry’uru rukingo rwa Covid-19 muri Afurika y’Epfo, ndetse aba mbere bazatangira kugeragerezwaho muri iki cyumweru”.

Madhi avuga ko iki gihugu gikeneye urukingo kubera ibihe kigiye kwinjiramo. Ati “Muri ibi bihe Afurika y’Epfo tugenda twinjira mu itumba n’ubucucike bwiyongera mu bitaro dukeneye urukingo kugira ngo twirinde ubwandu bwa Covid-19 kurenza ibindi bihe byose”

Ibi Madhi abihuriyeho na Minisitiri w’ubuzima muri Afurika y’Epfo, Zweli Mkhize nawe uvuga ko iki gihugu gikeneye urukingo cyane ko umubare w’abandura ugenda urushaho kwiyongera.

Afurika y’Epfo igiye kugeragerezwamo uru rukingo kugeza uyu munsi ibarirwamo abantu barenga ibihumbi 110 bamaze kwandura Covid-19 mu gihe abo imaze guhitana bo barenga ibihumbi bibiri.

Uretse Afurika y’Epfo biteganyijwe ko uru rukingo mu minsi ya vuba ruzageragerezwa no ku baturage basaga ibihumbi bitanu bo muri Brésil.