Iyi myigaragambyo yabaye ku itariki 21 Mutarama 2017, nyuma y’umunsi umwe Trump arahiriye kuba perezida wa 45 wa Amerika.

Iki gikorwa cyabereye muri Leta zitandukanye zigize Amerika, yitabiriwe n’abantu b’ingeri zose barimo n’ibyamamare, mu butumwa bwari bwanditse ku byapa basabaga uburenganzira bw’abagore, gukuramo inda, ubw’abirabura n’ibindi byinshi.

Icyamamare muri sinema, Scarlett Johansson, yavuze ko nubwo atatoye Trump yubaha amahitamo y’abamutoye ariko akabasaba nabo gushyigikira ibyifuzo byabo.

Ni mu gihe abandi basubiragamo amagambo atesha agaciro abagore, abirabura b’abimukira yagiye avugwa na Perezida Trump ubwo yari mu bikorwa byo kwiyamamaza.

Abageze mu zabukuru bitabiriye iyi myigaragambyo bagereranyije iki gikorwa n’ibyabaye hagati ya 1960-1970 ubwo baharaniraga uburenganzira bw’abirabura n’abagore.

Ni mu gihe abagabo bake bagaragaye muri iyi myigaragambyo bavugaga ko umugabo ushaka umutekano ashyigikira umugore w’umunyembaraga.

Radio Mpuzamahanga y’Abafaransa, RFI ivuga ko iyi myigaragambyo itagarukiye muri Amerika gusa kuko n’abagore bo hirya no hino ku isi bayitabiriye. Mu Bufaransa honyine hagaragaye abagore bagera ku bihumbi birindwi biganjemo abanyamerika bitabiriye uru rugendo.

Si mu Bufaransa honyine, no mu Bwongereza, Australia, u Budage, u Busuwisi, Kenya, u Buyapani na Israel, abagore bagiye bahurira kuri Ambasade ya Amerika, aho bakoze imyigaragambyo ariko mu mutuzo.

Donald Trump yarahiriye kuba perezida wa 45 wa Amerika ku itariki 20 Mutarama 2017; umuhango witabiriwe n’abantu bake ugereranyije no mu 2009 ubwo Barack Obama asimbuye yarahiriraga manda ye ya mbere.

Imbaga y'abagore bamagana Perezida Trump

[email protected]