Amerika yavuze yabisabye ishingiye ku makuru ataremezwa n’inzego zibishinzwe avuga ko hari umuntu ushobora kuba yarishwe na Ebola ku wa 8 Nzeri uyu mwaka mu Mujyi wa Dar es Salaam.

Tanzania imaze iminsi isabwa ko igenzura ryihariye kuri uwo muntu bivugwa ko yari umuganga w’umugore ryakorwa n’abanyamahanga ikavunira ibiti mu matwi ivuga ko icyo cyorezo kitarahagera. Bivugwa ko uwo muntu yari yanyuze mu mijyi itandukanye irimo uwa Songea, Njombe na Mbeya.

Mu kiganiro aherutse kugiranye n’itangazamakuru, Minisitiri w’Ubuzima wa Amerika, Alex Azar, yavuze ko Guverinoma ya Tanzania igomba kwemera iryo genzura ryihariye ku rupfu rw’umuntu bikekwa ko yishwe na Ebola rigakorwa’.

Ubu busabe bwatangajwe mu gihe Ishami rya Loni ryita ku buzima (OMS) ryaburiye abasura iki gihugu n’abagituye rishingiye ku igenzura ryizewe ryakozwe ku bantu bacyetsweho Ebola muri iki gihugu.

OMS yanavuze ko Tanzana yakomeje kuvurira ibiti mu matwi ku busabe bwinshi yagiye ihabwa ku gushaka amakuru yimbitse ku bantu bakekwaho icyo cyorezo.

Amerika yanavuze ko abantu bari mu ishyirahamwe ry’abaryamana bahuje ibitsina ko muri Tanzania nta mahoro bazahagirira kuko bashobora gukorerwa ibikorwa bibi birimo gufungwa, guhohoterwa n’ibindi nk’uko East African yabitangaje.

Tanzania ni kimwe mu bihugu bihana imbibi na Repubulika Iharanira Demokarasi ya Congo iki cyorezo kimaze igihe kibasiye, aho kimaze kwica abarenga 2000.

Ifoto yafashwe umugenzi ari gusuzumwa Ebola ku mupaka wa Goma