Angola igiye guha imyitozo ya gisirikare ingabo za Congo Kinshasa

00:00:00 IGIHE NETWORK

KINYARWANDA

ENGLISH

FRANCAIS

Angola igiye guha imyitozo ya gisirikare ingabo za Congo Kinshasa

Yanditswe na

Kayonga J.

Kuya 15 October 2015 saa 09:10

Yasuwe :

Yavuzweho:

Guhera mu kwezi kw’Ugushyingo uyu mwaka ingabo za Congo Kinshasa zizatangira guhabwa imyitozo n’ingabo za Angola, iyi ikazatangirwa mu gace ka Cabinda gaherereye mu birometero 383 mu majyaruguru ya Luanda, umurwa mukuru wa Angola. Aka gace ka Cabinda kangana na kimwe cya kane cy’u Rwanda, gahana imbibi na Congo Kinshasa.

General Etumba Didier, umugaba mukuru w’ingabo za Congo yemeje aya makuru y’uko ingabo ze zizatangira iyi myitozo mu kwezi gutaha.

Nubwo Angola imaze imyaka isaga 15 mu mahoro nta ntambara irimo, ni cyo gihugu gikoresha ingengo y’imari isumba izindi mu birebana n’igisirikare mu bihugu byose byo munsi y’ubutayu bwa Sahara. Umwaka ushize Angola yakoresheje akayabo ka miliyari 6,8 z’Amadolari y’Amerika mu kugura ibikoresho bya gisirikare ndetse no mu bindi bikorwa bijyanye n’ubwirinzi.

Angola iza nyuma ya Algeria mu gukoresha akayabo mu birebana n’igisirikare, ingengo yayo y’imari ya gisirikare kandi iruta iy’Afurika y’Epfo na Nigeria byifatanije, n’ubwo ubukungu bw’ibyo bihugu byombi buri imbere y’ubwa Angola, ndetse ibyo bihugu byombi bikaba binatuwe inshuro icumi kuyirenza.

Abasirikare ba Congo Kinshasa bazwiho ahanini kurangwa na disipulini nke mu kazi kabo, ndetse kenshi na kenshi bavugwaho kugira uruhare mu bikorwa bibangamye byo guhohotera abaturage bashinzwe kurinda.

Ingabo za Congo Kinshasa zakunze kujya zishinjwa gukorana n’izo mu mutwe wa FDLR ubarizwa mu mashyamba y’iki gihugu.