Uyu mugabo uherutse kwiyamamariza kuyobora Uganda, BBC yatangaje ko yatawe muri yombi ubwo yari yitabiriye imyigaragambyo y’amahoro isaba ko abayoboke b’ihuriro rye National Unity Platform bafunzwe n’ababuriwe irengero barekurwa.

Abenshi muri abo bayoboke batawe muri yombi mbere na nyuma y’amatora ya Perezida yabaye muri Mutarama uyu mwaka.

Uretse Bobi Wine watawe muri yombi, abigaragambyaga banatewe imyuka iryana mu maso kugira ngo batatane.

Kuri iki Cyumweru, Bobi Wine, yifashishije ikoranabuhanga, yahamagariye abayoboke be gukomeza kwanga ibyavuye mu matora byagaragaje ko Perezida Yoweri Museveni ari we watsinze, anasaba inzego z’umutekano kugaragaza abayoboke be baburiwe irengero.

Bobi Wine yaherukaga gutabwa muri yombi mu Ugushyingo 2020, ibintu byateye imyigaragambyo ikomeye mu gihugu, yaguyemo abasaga 50.

Bobi Wine yatawe muri yombi ubwo yari yitabiriye imyigaragambyo isaba ko abayoboke be barekurwa