Ikinyamakuru Jeune Afrique cyanditse ko ishami ry’umuryango w’abibumye ryita ku mpunzi HCR, kuri uyu wa gatanu tariki 18 Mata ryatangaje ko abaturage b’Abarundi barimo guhungira mu bihugu by’abaturanyi nk’u Rwanda na Repubulika iharanira Demokarasi ya Congo.
HCR yavuze ko itewe impungenge n’ihohoterwa rikorerwa bamwe mu Barundi bitewe no kutavuga rumwe ku matora bitegura mu kwezi kwa Gicurasi na Kamena uyu mwaka.
Adrian Edwards, umuvugizi wa HCR yagize iti “Muri rusange Abarundi basaga 8 000 bamaze guhungira mu bihugu by’ibituranyi mu byumweru bike bishize. Abagera ku 7 099 bari mu Rwanda n’aho abasaga 1060 bari muri RDC. Abasaga 60% bageze mu Rwanda ni abana kandi abenshi muri bo bahagera ntacyo bafite.”
U Burundi bwabayemo intambara yamaze imyaka isaga icumi, kuva mu 1993 kugeza 2002 ikurikirwa n’inzibacyuho yamaze imyaka itatu mbere y’amatora ya 2005.
Igitutu gikomeye kuri manda ya gatatu ya Pierre Nkurunziza
Kuba ishyaka rya Perezida Nkurunziza ridahwema kugaragaza ko rishaka ko aziyamamariza manda ya gatatu, abatavuga rumwe n’ubutegetsi bakomeje kumwotsa igitutu bavuga ko ari ukutubahiriza Itegeko Nshinga kuko ritabimwemerera.
Ishami ry’umuryango w’abibumbye ryita ku mpunzi HCR riravuga ko impunzi z’Abarundi zaritangarije ko mu gihugu cyazo hariyo ihohoterwa no kwibasirwa bishingiye kuri politiki, iterabwoba, gushimuta imiryango y’abatavugarumwe n’ubutegetsi.
Abandi bagatunga agatoki guhohoterwa n’urubyiruko rw’Imbonerakure ruturuka mu ishyaka riri ku butegetsi. Bakomeza bashinja imiryango irengera uburenganzira bwa muntu kutagira icyo ikora.
Ejo kuwa gatanu abantu babiri bakomerekejwe n’igipolisi n’igisirikare mu myigaragambyo yo kwamagana manda ya gatatu ya Perezida Nkurunziza nubwo ataratanga kandidatire ye.
Umuryango w’abibumbye utewe impungenge n’ibikomeje kubera mu Burundi. Akanama k’umutekano ka LONI kasabye ishyaka riri ku butegetsi n’abatavuga rumwe naryo guhagarika ibikorwa bikomeje gushyira mu kaga abaturage.
TANGA IGITEKEREZO