Amakuru aturuka mu Mujyi wa Bijumbura, avuga ko mu masaha ya mbere ya saa sita, abigaragambya batwitse imodoka eshatu zirimo Toyota Hilux yari ifite icyapa kiyiranga (plaque) ya Leta, n’indi modoka ya Toyota Coaster itwara abagenzi zatwikiwe mu Ngagara.

Abigaragambya baturutse mu muhanda wo ku rya 6 (quartier VI) mu Ngagara, bageze hafi y’aho bita Arusha, bafunga umuhanda. Aho ni ho izo modoka zahagaritswe, maze babanza kuzisukaho lisansi, maze barazishumika zirashya zirakongoka.

Gusa nk’uko abari aho ibyo byabereye babitangaza, mu bagenzi bari bari muri izo modoka ntawagize icyo aba kuko bahawe umwanya wo gukiza amagara ya bo.

Si mu Ngagara gusa habereye imyigaragambyo ikaze, kuko no hafi y’Iseminari ntoya ya Kanyosha muri Kinanira II, abigaragambya, bifashishije amabuye, bakozanyijeho n’abapolisi, ariko birangira batatanye hifashishijwe ibyuka bihuma amaso.

Abigaragambya bari biganjemo abari n’abategarugori bari baherekejwe n’abagabo, ari na bo bahanganye na Polisi, bakaba babanje kuririmba indirimbo yubahiriza igihugu mu majwi yuje agahinda, nyuma bateza ubwega mu mvugo zamagana manda ya gatatu.

Iyi myigaragambyo yakomeje kuri uyu munsi way o wa 14 mu gihe ari na bwo byatangajwe ku mugaragaro ko Perezida Nkurunziza azitabira inama y’Abakuru b’ibihugu bigize umuryango w’Akarere k’ibiyaga bigari (EAC), aho biteganyijwe ko azanatanga ibisobanuro ku miterere y’umutekano n’ibibazo bri mu Burundi.

Imyigaragambyo yabereye no mu tundi duce twa Bujumbura nk’ahitwa mu Bwiza, Jabe ndetse no mu Nyakabiga. Hari andi makuru avuga ko abigaragambya banatahuye inzu ebyiri za CNDD FDD zari zibitsemo intwaro, bakaba bahise bazisakambura.